प्रशिक्षक आलोन्सोलाई जोगाउँदै एमबाप्पे

काठमाडौं। किलियन एमबाप्पेले दुई गोल गरेपछि रियल मड्रिडले कोपा डेल रेको अन्तिम १६ मा प्रवेश गरेको छ।

राउन्ड अफ ३२ मा तेस्रो डिभिजनको क्लब तलाभेरालाई रियलले ३–२ ले पराजित गरेको हो। एमबाप्पेले ४१औं मिनेटमा पेनाल्टीमार्फत गोल गरे।

दोस्रो हाफको अन्त्यतिर पेनाल्टी क्षेत्र बाहिरबाट प्रहार गर्दै निर्णायक गोल पनि गरे। यो रियलका लागि सबै प्रतियोगितामा पछिल्ला ६ खेलमा उनको १०औं गोल थियो। पहिलो हाफको इन्जुरी समयमा म्यानुएल फरान्डोबाट भएको आत्मघाती गोलको प्रक्रियामा पनि एमबाप्पेको महत्त्वपूर्ण भूमिका रहेको थियो।

‘उनी निर्णायक बने,’ रियलका प्रशिक्षक जाबी आलोन्सोले भने,‘किलियनसँग गोल गर्ने स्वाभाविक क्षमता छ। तेस्रो गोल अत्यन्तै महत्त्वपूर्ण थियो, त्यसैले हामीले उनलाई मैदानमा राख्यौं र सुरुआती टोलीमा समावेश गर्‍यौं।’

तलाभेराले ८०औं मिनेटमा नाहुएल आरोयो र दोस्रो हाफको इन्जुरी समयमा गोन्जालो दी रेन्जोको गोलमार्फत खेलमा फर्किने प्रयास गर्‍यो। तर, रियलले अग्रता जोगाउँदै सम्भावित उलटफेर टार्न सफल भयो।

हार भएको भए हालैका निराशाजनक नतिजापछि आलोन्सोमाथि दबाब अझ बढ्ने थियो। खेलको अन्तिम मिनेटमा रियलका गोलकिपर आन्द्रेई लुनिनले गरेको कठिन सेभ निर्णायक सावित भयो र टोलीलाई जित दिलायो।