युरोप फर्किन चाहन्छन् सिल्भा

काठमाडौं। अनुभवी डिफेन्डर थियागो सिल्भाले बुधबार फ्लुमिनेन्सेसँगको आफ्नो बसाइ अन्त्य गरेका छन्। योसँगै उनी ब्राजिलका लागि विश्वकप खेल्ने आशा पुनर्जीवित गर्न युरोप फर्कन चाहेको बताइएको छ।

फ्लुमिनेन्से क्लबले ४१ वर्षीय डिफेन्डरको सम्झौता ६ महिना अगावै समाप्त गरेको घोषणा गरेको हो। उनी गत वर्षको मे महिनामा रियो दि जेनेरियोस्थित क्लबमा आबद्ध भएका थिए। यसअघि उनले सन् २००६ देखि २००८ सम्म पनि फ्लुमिनेन्सेका लागि खेलिसकेका थिए।

क्लबले जारी गरेको विज्ञप्तिमा एसी मिलान, पेरिस सेन्ट–जर्मेन (पीएसजी) र चेल्सीका पूर्वखेलाडी सिल्भाले फ्लुमिनेन्सेलाई समर्पण र प्रेमको अमिट विरासत छोडेर गएको उल्लेख गरेको छ।

यसैबीच, मंगलबार चेल्सीका पूर्वडिफेन्डर जोन टेरीले टिकटकमार्फत सिल्भालाई पुनः स्ट्यामफोर्ड ब्रिज फर्किएको देख्न चाहेको बताएका थिए। टेरीले भनेका छन्,‘उनका दुई सन्तान हाम्रो एकेडेमीमा छन्। निसन्देह उनी क्रिसमसका बेला परिवारसहित लन्डन फर्किनेछन्।’

सिल्भाले चेल्सीसँग सन् २०२१ मा च्याम्पियन्स लिग उपाधि जितेका थिए। जुलाईमा भएको क्लब विश्वकपमा फ्लुमिनेन्सेलाई सेमिफाइनलसम्म पुर्‍याउन उनले महत्त्वपूर्ण भूमिका खेलेका थिए।

सिजनभर अधिकांश खेलमा सुरुआती टोलीमा रहेका थिए। ब्राजिलियन क्लबहरूको सिजन डिसेम्बरमा समाप्त हुन्छ। सिल्भा पछिल्ला चार विश्वकपमा ब्राजिलको टोलीमा समावेश भएका थिए। उनले २०१३ को कन्फेडेरेसन्स कप र २०१९ को कोपा अमेरिका पनि ब्राजिलसँगै जितेका छन्।