आर्सनलमाथि दबाब बढाउँदै सिटी र भिल्ला

काठमाडौं।म्यानचेस्टर सिटी र एस्टन भिल्लाले जित निकाल्दै प्रिमियर लिगको शीर्षस्थानमा रहेको आर्सनलमाथि दबाब कायम राखेका छन्।

नटिङ्घम फरेस्टले टोटनह्यामलाई ३–० ले पराजित गर्दै रेलिगेसन क्षेत्रबाट आफूलाई केही माथि ल्याएको छ। टाइन–वियर डर्बीमा भने निक वोल्टेमाडेको आत्मघाती गोलका कारण सन्डरल्याण्डले न्युक्यासलमाथि १–० को जित हात पार्‍यो।

शनिबार वुल्भ्सविरुद्ध २–१ को जित निकाल्दै आर्सनलले अंक तालिकाको शीर्षमा आफ्नो अग्रता पाँच अंक पुर्‍याएको थियो। तर, त्यसको भोलिपल्ट उसका नजिकका प्रतिद्वन्द्वीहरूले पनि जितका साथ दबाब दिएका छन्।

दोस्रो स्थानमा रहेको सिटीले क्रिस्टल प्यालेसको मैदानमा ३–० को जित निकाल्यो भने तेस्रो स्थानको भिल्लाले लन्डन स्टेडियममा दुई पटक पछाडि परेपछि पुनरागमन गर्दै वेस्ट ह्यामलाई ३–२ ले हरायो।

हाल सिटी १६ खेलबाट ३६ अंक जोडेको आर्सनलभन्दा दुई अंक पछाडि छ। भिल्ला सिटीभन्दा एक अंक पछाडि रहेको छ।

सिटीको बदला

गत सिजन एफए कपको फाइनलमा प्यालेससँग पराजित भएको सिटीले सेलहर्स्ट पार्कमा जित निकाल्दै त्यसको बदला लियो।

सिटीका प्रशिक्षक पेप ग्वार्डियोलाले भने, ‘उनीहरू निकै बलिया छन्। हरेक पटक उनीहरूविरुद्ध खेल्दा निकै गाह्रो हुन्छ। हामी अझै शीर्षस्थानमा छैनौं। तर, हामी सिकिरहेका छौं। जे भयो त्यसबाट भविष्यमा अझनजिक पुग्नेछौं।’

एर्लिङ हालान्डले पहिलो हाफको अन्त्यतिर गोल गर्दै सिटीलाई अग्रता दिलाए। यो उनको प्रिमियर लिगमा १०१औं गोल थियो।

उनले ८९औं मिनेटमा पेनाल्टीमार्फत खेलको दोस्रो गोल पनि थपे। नर्वेयन स्ट्राइकरले यस सिजन क्लब र देशका लागि २७ खेलमा ३६ गोल गरिसकेका छन्।

हालान्ड १७ गोलसहित लिगका सर्वाधिक गोलकर्ता पनि हुन्। फिल फोडेनले हालान्डका दुई गोलको बीचमा सिटीको अर्को गोल गरेका थिए।