मुलरलाई हराएका मेसी

काठमाडौं। थोमस मुलर र लिओनल मेसीबीचको पुरानो प्रतिस्पर्धामा धेरैजसो समय जर्मन स्टार नै हावी हुँदै आएका थिए।

यी दुई १० पटक आमनेसामने हुँदा ७ पल्ट मुलरको टिमले जित निकाल्यो। २०१० को विश्वकपको क्वार्टरफाइनल र २०१४ को विश्वकप फाइनलमा पनि मुलरसम्मिलित जर्मनीले मेसीको अर्जेन्टिनालाई पराजित गर्दै नमिठो हार चखायो।

तर, शनिबारको रात भने मेसीको रहर पूरा हुने क्षण थियो। एमएलएस कप फाइनलमा इन्टर मियामीले मुलरको भ्यानकुभर ह्वाइटक्याप्सलाई ३–१ ले हराउँदै क्लब इतिहासमै पहिलो उपाधि जित्यो। मेसीले आफ्नो करिअरको ४७औं ट्रफी हात पारे।

यो उनको एमएलएसमा तेस्रो सिजन हो। ७२औं मिनेटमा रोड्रिगो डे पउलले मेसीले दिएको पासबाट अग्रता बनाए। रोकिनै नखोजेका उनले अतिरिक्त समयमा अर्को असिस्टसमेत उपलब्ध गराइदिए।

खेलपछि उनले भने,‘तीन वर्षअघि म एमएलएसमा आएँ र आज हामी एमएलएस च्याम्पियन छौं। गत वर्ष लिगबाट छिट्टै बाहिरियौं। यसपटक एमएलएस जित्नु हाम्रो मुख्य लक्ष्यमध्ये एक थियो।’

उनले थपे,‘टिमले यस वर्ष धेरै मिहिनेत गर्‍यो। धेरै खेल, थकान, सबैका बाबजुद हामीले इच्छाएको क्षण पायौं। यो सबै सुन्दर सफलता हो, खेलाडीहरूले यसको पूरा हक राख्छन्।’

मेसी र मुलर विश्वकप, च्याम्पियन्स लिग र क्लब वर्ल्ड कप विजेता खेलाडी हुन्। अर्थात् उनीहरूले प्रमाणित गर्न केही बाँकी छैन। तर, एमएलएसमा आएपछि उनीहरूको साझा लक्ष्य आफ्नो करिअरमा अर्को लिग उपाधि थप्नु थियो।

भ्यानकुभर १–० ले पछि परेपनि ६०औं मिनेटमा बराबरीमा फर्कियो। त्यसपछि पाएको मौका सदुपयोग गर्न नसक्दा मुलर निराश देखिन्थे। तर, अन्त्यमा ट्रफी समारोहमा उनले मुस्कानसहित मेसीलाई एमभीपी घोषित गरिँदा ताली बजाए।

उनका कोच यस्पर सोरेन्सेनले भने,‘हामी मिहिनेति टिम हौं। खेल १–१ को अवस्थामा थियो, जुन हामी चाहन्थ्यौं। तर, एक गल्ती भयो, बल मेसीसम्म पुग्यो र उनले उत्कृष्ट पास दिए।’

खेल सकिँदा मेसीलाई उनका सहकर्मीहरूले उफ्रँदै बधाई दिइरहेका थिए।