भारत साफबाट यू–१७ एसियन कपमा छनोट हुने एक मात्र टोली

काठमाडौं। भारत दक्षिण एसियाली फुटबल महासंघ (साफ)बाट एएफसी यू–१७ एसियन कपमा छनोट हुने एक मात्र टोली बनेको छ।

प्रतियोगिता अर्को वर्ष साउदी अरबमा हुने तय छ। साफबाट भारतसहित बंगलादेश, श्रीलंका, पाकिस्तान, भुटान, माल्दिभ्स र नेपालले सहभागिता जनाएको थियो। तर, ६ टोलीले छनोट चरण पार गर्न सकेनन्।

भारतले आफ्नो समूह ‘डी’ को अन्तिम छनोट खेलमा प्रबल प्रतिस्पर्धी इरानलाई २–१ ले पराजित गर्दै एसियन कपमा आफ्नो स्थान सुनिश्चित गरेको हो। सानदार पुनरागमन गर्दै भारतीय टोलीले एक समयमा असम्भव जस्तो देखिएको काम पूरा गरेको हो। यो प्रतियोगितामा भरतको १०औं उपस्थिति हुनेछ।

ईकेए एरिनामा भएको खेलमा डल्लाल्मुआन गान्ग्टेले पहिलो हाफको इन्ज्युरी समयको पहिलो मिनेटमा पेनाल्टी गोल गरे। गुनलेइबा वाङ्खेइरकपामले ५२औं मिनेटमा निर्णायक गोल गरे। इरानले भने १९औं मिनेटमा अमीर्रेजा वालिपुरको गोलमार्फत अग्रता लिएको थियो।

इरान सात अंकसहित अविजित अवस्थामा खेलमा प्रवेश गरेको थियो। बराबरीले पनि छनोट पार गर्न सक्थ्यो। भारतलाई भने जितबाहेक अर्को विकल्प थिएन।

पहिले गान्ग्टेले पेनाल्टीमा गोल गर्दै बराबरी ल्याए र त्यसपछि वाङ्खेइरकपामले अप्रत्याशित अग्रता दिलाए। यस जितसँगै भारतले सात अंकमा इरानसँग बराबरी गर्दा हेड–टु–हेडमा अगाडि रहेर एशियाका युवा फुटबलको शक्तिशाली टोलीविरुद्ध क्वालिफिकेशन सुनिश्चित गर्‍यो।