पेनाल्टीले जोगिएको रियल

काठमाडौं। स्पेनिस ला लिगामा आइतबार गिरोनासँग १–१ को बराबरीमा रोकिँदा रियल मड्रिड शीर्षस्थान फर्काउन असफल भयो।

रेलिगेशनको जोखिममा रहेको गिरोनाविरुद्ध मड्रिडले अपेक्षित दबदबा देखाउन सकेन। मोन्टिलिभी स्टेडियममा खेलिएको खेलमा घरेलु टोलीले पहिला प्रहार गर्‍यो।

पहिलो हाफको अन्त्यमा अज्जेदिन औनाहिले गोल गर्दै गिरोनालाई अग्रता दिए।

मड्रिडले दोस्रो हाफमा गति मिलाउन थाल्यो र ६७औं मिनेटमा किलियन एमबाप्पेले पेनाल्टीमा गोल गर्दै खेल बराबरीमा ल्याए।

च्याम्पियन्स लिगमा ओलिम्पियाकोसविरुद्ध चार गोल गरेका एमबाप्पेले फेरि निर्णायक बन्ने मौका पाए। इन्जुरी समयमा पेनाल्टी बक्स भित्रबाट हानेको प्रहार थोरै मात्र बाहिरिँदा मड्रिड जित हातबाट चुक्यो।

प्रशिक्षक जाबी अलोन्सो टिमको नतिजाबारे सकारात्मक त भए पनि परिणामप्रति असन्तुष्टि देखिए। 'टिमले राम्रो प्रतिक्रिया दियो, यद्यपि जितका लागि पर्याप्त थिएन,' उनले भने,'दोस्रो हाफमा हामीले सुधार्यौं, खेल उल्ट्याउन सक्थ्यौं, तर सिर्जना गरेका अवसरहरू सदुपयोग गर्न सकिएन।'

मड्रिडले ८०औं मिनेटमा रोड्रिगोमाथि भएको ट्याकलका कारण पेनाल्टी पाउनुपर्ने दावी गरेको थियो।

लगातार तेस्रो ड्रपछि रियल मड्रिडले शीर्ष स्थान गुमाएको छ। अलाभेसलाई ३–१ ले हराएको बार्सिलोनाले शनिबारै शीर्ष स्थान कब्जा गरिसकेको छ।

१४ खेल खेलेको बार्सिलोनाको ३४ अंक छ। समान खेलबाट मड्रिडको ३३ अंक छ।गिरोना भने १८औं स्थानमा छ र पछिल्ला ६ लिग खेलमध्ये एकपटक मात्र जितेको छ।