बोपाराको लगातार तेस्रो अर्धशतक, विराटनगरलाई चुनौतीपूर्ण लक्ष्य

काठमाडौं। रवी बोपाराको लगातार तेस्रो अर्धशतकसँगै चितवन राइनोजले नेपाल प्रिमियर लिग (एनपीएल)मा विराटनगर किङ्सलाई विशाल लक्ष्य दिएको छ।

कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ थालेको चितवनले ५ विकेट गुमाउँदै १७५ रनको लक्ष्य दिएको हो।

रवीले सर्वाधिक ६५ रन बनाए। ३८ बल खेलेका उनले ३ चौका र ४ छक्का प्रहार गरे।

उनको यो जारी प्रतियोगितामा लगातार तेस्रो अर्धशतक हो। उनले कर्णाली याक्सविरुद्ध ५२ र लुम्बिनी लायन्सविरुद्ध ६६ रन बनाएका थिए।

सैफ जैब ३२, देव खनाल २८ र डेबिड मिलान १७ रनमा आउट हुँदा कुशल मल्लले अविजित २० रन बनाए।

विराटनगरका सन्दीप लामिछाने र मर्चेन्ट डी लेङ्गेले समान २ विकेट हात पारे।