बार्सिलोनाले चेल्सीलाई सकेन

काठमाडौं। चेल्सीले मंगलबार च्याम्पियन्स लिगमा पुराना दिनको सम्झना दिलाउने गरि उत्कृष्ट प्रदर्शन गर्दै बार्सिलोनालाई ३–० ले हरायो।

यस जितसँगै लन्डन क्लबले स्वचालित छनोटमा स्थान सुरक्षित गर्ने दिशामा ठूलो पाइला चालेको छ। यता स्पेनिस क्लब बार्सिलोनालाई प्लेअफमा धकेलिनु नपरोस् भनेर संघर्ष गर्नुपर्ने स्थितिमा पुगेको छ।

बार्सिलोनाका कप्तान रोनाल्ड अराउजोले पहिलो हाफको अन्त्यतिर रातो कार्ड खाँदा परिस्थिति झनै दबाबपूर्ण बनेको थियो। चेल्सीका १८ वर्षे एस्टेवाओले अद्भुत दोस्रो गोल गरे भने लियम डेलापले तेस्रो थपे। चेल्सीका तीन गोल भने भिएआरका निर्णयका कारण रद्द भएका थिए।

'एस्टेवाओका लागि ठूलो रात, क्लबका लागि पनि त्यति नै ठूलो सफलता,' चेल्सीका प्रशिक्षक एनजो मारेस्काले भने। स्ट्याम्फोर्ड ब्रिजको वातावरण पनि पुरानै दिनझैं थियो।

चेल्सीले युरोपका शीर्ष क्लबहरूलाई पराजित गर्दै आएको थियो। खेलभरि चेल्सीले तीव्र पास, छिरो आक्रमण र दुवै विंगबाट निरन्तर दबाब बनायो।

तर, बार्सिलोनाका लागि रात निकै निराशाजनक रह्यो। २७औं मिनेटमा मार्क कुकुरेलियाको क्रस क्लियर गर्न खोज्दा जुल्स कुन्डेको खुट्टाबाटै बल आफ्नै पोस्टतिर लागेर चेल्सीले अग्रता लियो।

त्यसको एक मिनेटअघि कुकुरेलियालाई धक्का दिँदा अराउजोले दोस्रो पहेंलो कार्ड पाएर बार्सिलोना दश जनामा सीमित भयो। बार्सिलोनाका १६ वर्षे प्रतिभा लामिन यमल भने जम्न सकेनन् र अन्त्यतिर उनी परिवर्तन भएर बाहिरिए।

७३औं मिनेटमा फर्नान्डेजको क्रसमा डेलापले सिजनको पहिलो गोल गर्दै चेल्सीका लागि सानदार जित पूरा गरे। यो जितसँगै चेल्सी अस्थायी रूपमा शीर्ष आठ स्वचालित छनोटको स्थानमा उक्लिएको छ।

अब पाफोस, एटालान्टा र नेपोलीसँग खेल्दै अन्तिम चरणमा आफ्नो स्थान पक्का गर्न खोज्नेछन्।