संकटपूर्ण अवस्थामा लिभरपुल

काठमाडौं। लिभरपुलको खराब प्रदर्शन क्रम जारी छ। बुधबार राति एन्फिल्डमा युवा टोलीसहित मैदान उत्रिएको लिभरपुल क्रिस्टल प्यालेससँग ३–० ले पराजित हुँदै लिग कपबाट बाहिरिएको छ।

पहिलो हाफमै इश्माइला सारले दुई गोल गर्दै पाहुना टोलीलाई अग्रता दिलाए भने खेलको अन्त्यतिर येरेमी पिनोले तेस्रो गोल गर्दै प्यालेसलाई सहज जित दिलाए। यो पराजयसँगै लिभरपुलले पछिल्ला सातमध्ये छैटौं खेलमा हार बेहोरेको छ।

योसँगै यस सिजनको सुरुआत नै क्लबका लागि संकटपूर्ण बनेको छ। मुख्य प्रशिक्षक आर्ने स्लोटले यस खेलमा आफ्नो अधिकांश प्रमुख खेलाडीहरूलाई विश्राम दिएका थिए।

मोहमद सालाह, भर्जिल भान डाइक, कोडी गाक्पो र अलेक्जान्डर इसाकलाई समेत बेञ्चमा राखिएको थियो। अनुभवहीन टोलीलाई प्यालेसले सहजै चिरफार गर्दै सारका ४१औं र ४५औं मिनेटका दुई गोलले लिभरपुललाई खेलमै पछि पारेको थियो।

दोस्रो हाफमा भित्रिएका १८ वर्षीय डिफेन्डर अमारा नालोले मात्र १२ मिनेटमै रातो कार्ड पाए। उनको लिभरपुलका लागि दोस्रो उपस्थितिमा दोस्रो पटक रातो कार्ड हो।

उता, आर्सनलले नयाँ रेकर्ड प्रदर्शन गर्दै क्वार्टरफाइनलमा स्थान बनाएको छ। म्यानचेस्टर सिटी, चेल्सी र गत वर्षको विजेता न्युक्यासल पनि अन्तिम आठमा प्रवेश गरेका छन्। न्युक्यासलले टोटनह्यामलाई २–० ले हराएको थियो।

लगातार चार प्रिमियर लिग खेल हारिसकेका प्रशिक्षक स्लोटले भने आफ्नो टोली छनोटको बचाउ गर्दै भने,‘हामीसँग अहिले करिब १५–१६ मात्र पहिलो टोलीका खेलाडी उपलब्ध छन्। त्यसैले यही टोली रोज्न बाध्य भएँ। दबाब पहिले नै धेरै छ।’