अञ्जना नायक बन्दा नेपालले भारतलाई हरायो

काठमाडौं। गोलकिपर अञ्जना रानामगर नायक बन्दा टाइब्रकेरमा नेपालले मैत्रीपूर्ण ‘च्यारिटी म्याच’ जितेको छ।

भारतको सिक्किमस्थित पाल्जोर रंगशालामा बुधबार सम्पन्न खेलमा घरेलु टोलीलाई ३–० ले हराएको हो। टाइब्रेकरमा सविता रानामगर, रश्मीकुमारी घिसिङ र निशा ठोकरले गोल गरिन्। अनिताको प्रहार बाहिरियो। भारतका तीन खेलाडीले गोल गर्न सकेनन्। दुई प्रहार अञ्जनाले बचाएकी थिइन्।

दुवै टोलीले निर्धारित ९० मिनेटको खेल १–१ को बराबरीमा सकिएको थियो। दुवै गोल पहिलो हाफमा भएको थियो। भारतकी सौम्या गुगुलोथले गोल गरिन्। नेपालकी अनिता बस्नेतले बराबरी गोल फर्काइन्।

खेलको ३०औं मिनेटमा भारतले सुरुआती अग्रता लियो। ब्याक पास आएको बललाई डिफेन्डर निशा थोकरले क्लियर गर्ने प्रयास गरेकी थिइन्। तर, सौम्यालाई नै बल लाग्न पुग्यो। उनले निशाालाई नै बिट गर्दै गोल गरिन्।

तर, पहिलो हाफको इन्जुरी समयमा नेपाल खेलमा फर्कियो। कप्तान अनिताले प्रहार गरेको कर्नर बल ड्रप हुँदै गोलमा परिणत भयो। योसँगै नेपाल हारबाट जोगियो। त्योसँगै खेल टाइब्रेकरमा धकेलिएको हो।