पूजाले बंगलादेशको नासरिन एकेडेमीबाट खेल्ने

काठमाडौं। नेपाली महिला फुटबल टोलीकी डिफेन्डर पूजा रानाले साफ क्लब च्याम्पियनसिप बंगलादेशी क्लबबाट खेल्ने भएकी छन्।

उनलाई बंगलादेशको नासरिन स्पोर्ट्स एकेडेमीले अनुबन्ध गरेको हो। यससँगै उनी बंगलादेशी महिला फुटबल इतिहासमै पहिलो विदेशी खेलाडी बनेकी छन्।

नासरिन स्पोर्ट्स एकेडेमीले सामाजिक सञ्जालमार्फत उक्त जानकारी दिएको हो। एकेडेमीले लेखेको छ,‘पूजा राना अब नासरिन स्पोर्ट्स एकेडेमीको हिस्सा बनेकी छन्। यो बंगलादेशी महिला फुटबल इतिहासकै पहिलो विदेशी साइनिङ हो।’

उनी पछिल्लो समय भुटानी क्लब ट्रान्सपोर्ट युनाइटेडबाट खेलिरहेकी थिइन्। तर, उक्त क्लबसँग सम्झौता सकिसकेको छ। त्यसैले बंगलादेशी क्लबसँग खेल्ने बाटो खुलेको हो।

प्रतियोगिताको पहिलो संस्करण डिसेम्बर ५ देखि २० सम्म त्रिपुरेश्वरस्थित दशरथ रंगशालमा हुने यसअघि नै तय भइसकेको छ।

प्रतियोगितामा नासरिनबाहेक नेपालको एपिएफ क्लब, भारतको इस्ट बंगल क्लब, भुटानको ट्रान्सपोर्ट युनाइटेड, र पाकिस्तानको कराँची सिटी एफसी सहभागी हुनेछन्।