भारत पुगेको नेपाली टोलीलाई बसोबासमा विभेद !

काठमाडौं। नेपाली राष्ट्रिय महिला टोलीका मुख्य प्रशिक्षक नविन न्यौपानेले त्रिदेशिय मैत्रीपूर्ण अन्तर्राष्ट्रिय फुटबल प्रतियोगिताअघि उचित बसोबासप्रति असन्तुष्टि जनाएका छन्।

इरानसँग शुक्रबार हुन लागेको खेलअघि उनले भने,‘बसोबासबाहेक अरू सबै कुरा ठीक छन्।’ नेपालले शिलोङको जवाहरलाल नेहरू स्टेडियमस्थित पोलो ग्राउन्डमा इरानसँग प्रतिस्पर्धा गर्दै प्रतियोगिताको सुरुआत गर्नेछ।

बिहीबार भएको पत्रकार सम्मेलनपछि उनलाई बसोबाससम्बन्धि प्रश्न गरिएको थियो। उक्त प्रश्नको जवाफ दिँदै प्रशिक्षक न्यौपानेले भने,‘किन यस्तो विभेद भइरहेको हो भन्ने प्रश्न उठ्छ। किनभने भारत र इरानका टोलीहरू राम्रो होटलमा राखिएका छन्। तर, हामीलाई होटल म्यानेजमेन्ट इन्स्टिच्युटको होस्टलमा राखिएको छ।’

यसअघि इरानका मुख्य प्रशिक्षकले पनि टोलीलाई अभ्यासका लागि पर्याप्त समय नदिएको भन्दै पहिलो खेल स्थगित गर्न माग गरेका थिए। तर, त्यो माग पूरा भएन। उक्त खेलमा इरानले घरेलु टोली भारतलाई २–१ ले पराजित गरेको थियो।

प्रि–म्याच पत्रकार सम्मेलनमा न्यौपानेले आफ्नो टोली तीनै अंकका लक्ष्यका साथ मैदानमा उत्रिने बताए। शिलोङमा यसअघि पनि भ्रमण गरिसकेका उनले भारत र इरान दुवै बलिया प्रतिद्वन्द्वी भएको स्वीकारेका छन्। यद्यपि, नेपालले हिरो गोल्ड कप २०१९ मा इरानलाई ३–० ले हराएको थियो।

भारतलाई पनि साफका पछिल्लाम दुई संस्करणमा लगातार हराउँदै नेपाल फाइनल पुगेको छ। ‘हाम्रो टोली ९० मिनेटसम्म उत्कृष्ट प्रदर्शन गर्ने तयारीमा छ र हामी आत्मविश्वासी छौं,’ उनले भने।

इरानकी मुख्य प्रशिक्षक मार्जिएह जाफरिबारावातीले पनि नेपाल टोलीको प्रशंसा गर्दै बलियो टोलीको रूपमा लिएकी छन्। उनले खेल निकै रोमाञ्चक हुने अपेक्षा गरेकी छन्। उनले भनिन्,‘हाम्रो टोलीले पछिल्ला कमजोरी सुधार्ने प्रयास गरिरहेको छ र हामी बलियो प्रदर्शनमा पूर्ण रूपमा केन्द्रित छौं।’