एन्फामा ‘अर्ली इलेक्सन’को माग

काठमाडौं। अखिल नेपाल फुटबल संघ (एन्फा)का वरिष्ठ उपाध्यक्ष वीरबहादुर खड्काले ‘अर्ली इलेक्सन’को माग गरेका छन्।

उनले सोमबार पत्रकार सम्मेलनमार्फत नेपाली फुटबलको अवस्था र नेतृत्वको कार्यशैलीप्रति चिन्ता व्यक्त गर्दै तत्काल निर्वाचनको आवश्यकता औंल्याएका हुन्।

खड्कासँगै उपाध्यक्ष विराटजंग शाही र सदस्यहरू रविनचन्द ठकुरी र रुपेश अधिकारी पनि उपस्थित थिए। खड्काले भने,‘एन्फाले सुशासन कायम गर्न सकेन। बहराइनमा खेलिएको होम खेलको २० हजार डलर अझै प्राप्त भएको छैन। अहिले पनि हामी आफ्नो होम खेल भियतनाममा गएर खेल्दैछौं। यही कारणले हामीले नेतृत्वप्रति असन्तुष्टि जनाएका छौं।’

नेम्वाङको नेतृत्वले आर्थिक अपारदर्शिता, फुटबल विकासप्रति उदासीनता र संवेदनशील घटनामा लापरवाही गरेको पनि उनको ठहर छ। मकवानपुर एन्फा एकेडेमीमा खेलाडीको मृत्युबारे छानबिन नहुनु, पीडित परिवारलाई न्याय नदिनु, लिग सञ्चालनमा ढिलाइ, अन्तर्राष्ट्रिय खेल आयोजना गर्न असफलता र वाचा गरिएका पुरस्कार नदिनुजस्ता मुद्दा उनले उठाएका छन्।

उनले,‘यदि फुटबल गर्ने मन छैन भने तत्काल राजीनामा दिनुस्। नेतृत्व असक्षम हुँदा यसको असर सम्पूर्ण नेपाली फुटबलमा परेको छ। अब जिम्मेवारीपूर्वक निर्णय गर्नु जरूरी छ।’ उनले दशरथ र पोखरा रंगशाला अन्तर्राष्ट्रिय मापदण्डअनुसार नबनाउँदा खेल आयोजनाका अवसर गुम्नु, विश्वकप टिकट र खेल पोशाक खरिदमा अनियमितताजस्ता विषयमा पनि नेतृत्वको आलोचना गरे।

’सबै जना मत लिएर राजनीति मात्र गर्दैछन्। लिग सञ्चालन नगर्ने, राजीनामा नदिने हो भने अब एन्फाको अर्ली इलेक्सन गर्न आवश्यक छ। नेपाली फुटबललाई थप दुर्घटनाबाट जोगाउन यही उपाय बाँकी छ,’ उनले भने।