यमललाई अत्याधिक खेलको भार

बार्सिलोनाका किशोर खेलाडी लामिन यमलबारे अहिले गम्भीर चिन्ता व्यक्त गरिएको छ।

१८ वर्षमै विश्व फुटबलका उत्कृष्ट प्रतिभामध्ये एकका रूपमा स्थापित भएका उनी १५ वर्षको उमेरमा पहिलोपटक चर्चामा आएका थिए। त्यहीदेखि कीर्तिमानको शृङ्खला कायम गर्दै आएका यमललाई अहिले भने अत्यधिक खेलभारले दीर्घकालीन जोखिममा पार्ने चेतावनी दिइएको छ।

विश्व फुटबल खेलाडीहरूको संघ (फिफप्रो) ले सोमबार सार्वजनिक गरेको प्रतिवेदनले यमलमाथि परेको दबाबलाई चिन्ताजनक भनेको छ। प्रतिवेदनअनुसार १८ वर्ष नपुग्दै उनले १३० वटा सिनियर खेल खेलेका छन्, जुन अघिल्ला युवा खेलाडीहरूको तुलनामा निकै बढी हो।

आन्द्रे एनिएस्टाले त्यही उमेरसम्म ४० खेल मात्र खेलेका थिए भने बार्सिलोनाकै अर्का युवा खेलाडी गाभीले ६० खेल खेलेका थिए। फिफप्रोको उच्च प्रदर्शन सल्लाहकार नेटवर्कका अध्यक्ष डेरेन बर्गेसका अनुसार २४–२५ वर्षसम्म शरीर र मानसिकता अझै विकास हुँदै जाने भएकाले त्यो उमेरअघि खेलाडीलाई अत्यधिक खेलमा उतार्नु चोटपटक र करिअर छोटिने खतरा बढाउनु हो।

उनले यसलाई निकै खतरनाक प्रवृत्ति भने। यमलले युरोपियन च्याम्पियनसिप जित्ने सबैभन्दा कान्छो खेलाडी, ला लिगामा गोल गर्ने सबैभन्दा कान्छो, स्पेनको लागि खेल्ने सबैभन्दा कान्छो र बार्सिलोनाका लागि १०० खेल पुरा गर्ने सबैभन्दा कान्छो खेलाडी बनेर इतिहास रचेका छन्।

गत हप्ता उनले लगातार दोस्रो वर्ष विश्वकै उत्कृष्ट युवा खेलाडीको रूपमा कोपा ट्रफी पनि जिते। तर, उनको लगातार प्रयोग र थोरै विश्रामले अब दीर्घकालीन असर पार्ने आशंका गरिएको छ।

फिफप्रोले फुटबलमा पर्याप्त विश्राम सुनिश्चित गर्नुपर्ने र यसका लागि नयाँ नियम ल्याउनुपर्ने माग गरेको छ। प्रतिवेदनले अन्य खेलसँग तुलना गर्दै एनबीए फाइनल खेल्ने खेलाडीलाई १४ हप्ता र मेजर लिग बेसबल फाइनल खेलाडीलाई १५ हप्तासम्म बिदा मिल्ने तर युरोपेली फुटबलरलाई भने तीन हप्तामात्र पाउने तथ्य प्रस्तुत गरेको छ।

प्रिमियर लिगका खेलाडी क्रिस वुडले पनि फुटबलमा पर्याप्त विश्राम भए खेलाडीले लामो समयसम्म खेल्न सक्ने बताए। उनको भनाइमा एनबीएमा लेब्रोन जेम्स ४० वर्ष नाघ्दा पनि उच्च स्तरमा खेलिरहेका छन्।

फुटबलमा (क्रिस्टियानो) रोनाल्डोजस्ता केही खेलाडी मात्र ४० नाघेर खेलेका छन्। पर्याप्त विश्राम भए यस्तो उदाहरण अझ धेरै देखिन सक्थ्यो। यो फिफप्रोको पहिलो प्रतिवेदन हो जसमा नयाँ संरचनामा आएको च्याम्पियन्स लिग र क्लब वर्ल्ड कपसमेत समेटिएको छ।

संगठनले यसै सन्दर्भमा फिफाको शासन र निर्णय प्रक्रियाविरुद्ध औपचारिक गुनासो पनि दर्ता गरेको छ। गत सिजन लुका मोड्रिच, फेडेरिको भाल्भेर्दे र फाबियन रुइजजस्ता खेलाडीले ७० भन्दा बढी खेल खेलेको प्रतिवेदनले देखाएको छ।

फिफप्रोका अनुसार ५५ भन्दा बढी खेललाई अत्यधिक भार मानिन्छ। संगठनका अध्यक्ष बर्गेसले भने, 'फुटबललाई बलियो बनाउन खेलाडीहरूको सुरक्षा अनिवार्य छ। खेलाडीलाई पर्याप्त विश्राम दिने प्रावधान बनाउँदा खेल कमजोर हुँदैन, बरु अझ सबल र प्रतिस्पर्धी हुन्छ।'

फिफप्रोले जलवायु परिवर्तन र बढ्दो गर्मीका कारण भविष्यमा खेलाडीहरूको सुरक्षाका लागि थप प्रोटोकल आवश्यक पर्ने चेतावनी पनि दिएको छ।