राफिन्हा र जोआन एकै साथ घाइते

काठमाडौं। फरवार्ड राफिन्हा र नयाँ गोलकिपर जोआन गार्सियाबिना नै बार्सिलोना केही साता मैदान उत्रिनुपर्ने भएको छ।

यो समरमा एस्पान्योलबाट आएका गार्सियाले लगातार सबै खेलमा सुरुआत गरेका थिए। तर, उनको बायाँ खुट्टाको घुँडामा मिनिस्कस चोट लागेपछि आर्थ्रोस्कोपिक शल्यक्रिया गर्नुपर्ने भएको क्लबले शुक्रबार जनाएको छ।

बार्सिलोनाले गार्सियालाई करिब ४ देखि ६ हप्तासम्म बाहिर रहने अनुमान गरेको छ। स्पेनिस सञ्चारमाध्यमका अनुसार उनी शुक्रबारको प्रशिक्षणमै घाइते भएका हुन्।

त्यस्तै, ब्राजिलियन फरवार्ड राफिन्हा दाहिने ह्यामस्ट्रिङमा चोट लागेर करिब तीन हप्तासम्म टिम बाहिर रहने भएका छन्। उनले बिहीबार भएको ओभिएदोविरुद्धको ३–१ को जितमा चोट बेहोरेका थिए।

आइतबार बार्सिलोनाले लिगमा रियल सोसिडाडसँग खेल्नेछ। त्यसपछि तीन दिनमै युरोपियन च्याम्पियन पेरिस सेन्ट–जर्मेन (पीएसजी)लाई च्याम्पियन्स लिगको दोस्रो म्याचडेमा आमन्त्रणा गर्नेछन्।

अक्टोबर २६ मा भने सिजनको पहिलो एल क्लासिकोमा रियल मड्रिडसँग भिड्ने कार्यक्रम छ। यता लामिन यमलले सामाजिक सञ्जालमार्फत आफू चार खेल गुमाएपछि अब फर्कन तयार भएको जानकारी दिएका छन्। तर, चिकित्सकले अझै उनलाई खेल्न अनुमति दिएका छैनन्।

बार्सिलोना पहिले नै मिनिस्कस शल्यक्रियापछि पुनःस्थापनामा रहेका मिडफिल्डर गाभी पाएक्जबिना खेलेको छ। वोज्सेक स्चेन्स्नीले गार्सियाको स्थान लिने सम्भावना छ भने राफिन्हाको ठाउँमा मार्कस रासफोर्ड वा फेरान टोरेसले खेल्न सक्ने अनुमान गरिएको छ।