नेपाललाई बदलासँगै उपाधिको अवसर

काठमाडौं। ढाकाको बसुन्धरा किङ्स एरेनामा सोमबार साँझ साफ महिला यु–२० च्याम्पियनसिपको राउन्ड रोबिनको अन्तिम खेल हुनेछ। तर, यो नेपाली टोलीको सपना र प्रतिशोधको निर्णायक खेल बन्ने छ।

नेपाल पहिलो उपाधिको लक्ष्य बोकेर बंगलादेश उडेको हो। अब नेपाल त्यही देशसँग उपाधि खोस्न खेल्नेछ। अंकतालिकाको गणितले भन्छ– नेपालले च्याम्पियन बन्न बंगलादेशलाई हराउनैपर्छ।

बराबरीले त पर्याप्त हुने नै छैन। तर, यो खेल अंकको गणितसँग मात्रै होइन, सम्मान फर्काउने अवसरसँग पनि जोडिएको छ।

पछिल्लो खेलसम्म आइपुग्दा दुवै टोलीले ५ खेल खेलेका छन्। बंगलादेश सबै खेल जितेर १५ अंकसहित शीर्षमा छ। नेपाल १२ अंकसहित दोस्रोमा। तर, नेपालको गोल संख्या ३० छ, जुन बंगलादेशभन्दा ६ गोल बढी हो।

यति हुँदा पनि नेपाल पछि छ। यो स्वभाविक नै छ। बंगलादेशसँगको पहिलो भेटमा बेहोरेको ३–२ को हारले नेपालको सिंगो समीकरण उल्टिएको हो।

अब नेपालसँग एउटै विकल्प एउटै छ, जित। नेपालले पछिल्ला तीन खेलमा विपक्षीलाई एकपटक पनि गोल गर्न दिएको छैन। श्रीलंकामाथि ७–० को दोहोरो जित र भुटानमाथि ८–० को एकतर्फी प्रदर्शनले नेपाली टोलीको लय बलियो रहेको पुष्टि हुन्छ। 

तर, त्यही बीचमा बंगलादेश पनि सम्हालिँदै अगाडि बढेको छ। श्रीलंकालाई ९–१ र ५–०, भुटानलाई ४–१ र ३–० ले हराउने क्रममा उसले पनि उपाधि होडलाई हल्कामा लिएको छैन।

यही सन्दर्भमा फर्कनुपर्छ नेपाली टोलीका कप्तान बिर्सना चौधरीको भनाइमा। उनी भन्छिन्, ‘हामी च्याम्पियन बन्नै आएका हौं। भुटानसँग जस्तै प्रदर्शन गर्न सक्यौं भने बंगलादेशलाई पनि हराउन सक्छौं।’

यो शब्द र पछिल्ला खेलका प्रदर्शनहरूले टोली आत्मविश्वासले भरिपूर्ण रहेको पुष्टि गर्छ। बिर्सनाले गोल, असिस्ट र नेतृत्व तीनै स्थानमा आफ्नो प्रभाव छाडेकी छन्।

स्ट्राइकर पूर्णिमा राई १० गोल गर्दै प्रतियोगिताकै सर्वाधिक स्कोरर बनेकी छन्। मीना देउवा पनि प्रभावशाली लयमा छिन्। समीक्षा मगर र कुशुम खतिवडाले पनि स्कोर कार्डमा गोल संख्या थपिरहेकी छन्। यी खेलाडीलाई सेनु परियार, वर्षा ओली र सुक्रिया मियाले असिस्ट निकाल्दै सहयोग गरिरहेका छन्।

त्यसैले नेपालको आक्रमण लाइन बलियो देखिएको छ। तर, मुख्य प्रशिक्षक यमप्रसाद गुरुङ भन्छन्,‘हामीले अघिल्ला केही खेलमा सेल्फिस खेलेका छौं। बंगलादेशसँग गल्ति गरेर पहिलो हाफमै दुई गोल खाएका छौं।’

उनको संकेत प्रस्ट छ। पहिलो खेलमा बंगलादेशसँग केमा चुकियो भन्ने आत्ममूल्यांकनपछि अन्तिम खेलको रणनीति निर्माण हुनेछ। स्ट्राइकिङ लाइनमा केही फेरबदलको संकेत उनी दिइरहेका छन्, जसले टिमको लयलाई अझ धारिलो बनाउने अपेक्षा गर्न सकिन्छ।

याद गर्नुपर्छ, बंगलादेशसँगको पहिलो भेटमा नेपाल २–० ले पछि परेको थियो। तर, दोस्रो हाफमा अनिशा राई (पेनाल्टीमा) र मीनाले गोल गर्दै खेल २–२ को बराबरी ल्याएका थिए। त्यो खेल ३–२ मा टुंगिँदा नेपालले अन्तिम मिनेटमा गोल खाएर हार बेहोर्नु परेको थियो। 

यही पीडा अहिले प्रतिशोधमा रूपान्तरित भएको छ। सोमबारको खेल औपचारिक रूपमा प्रतियोगिताको अन्तिम हो। तर, नेपाली टिमका लागि त्यो फाइनल सहर, बदला लिने र उपाधि उचाल्ने अवसरको त्रिकोणात्मक भिडन्त हुनेछ।

त्यस खेलले उपाधिको निर्णय मात्रै गर्ने छैन, नेपाली महिला फुटबलको मनोबल मात्रै फर्काउने छैन, भविष्यको नक्शा पनि कोर्नेछ।