बीर गणेशमान दौड ५ सयले दौडने

काठमाडौं । पाँचौं संस्करणको बीर गणेशमान सिंह १० किलोमिटर दौड ५ सय धावकले दौडने भएका छन् । 

गणेशमान सिंह फाउन्डेसन र बीर गणेशमान सिंह स्पोर्ट्स कमिटीद्धारा आयोजित प्रतियोगितामा महिला, पुरुष विधामा ५ सय जनाले नाम दर्ता गराएको आयोजकले जानकारी दिएको छ। 

महिला र पुरुष विधा समावेश दौडमा विभागीय टिम, विभिन्न संघ, संस्था, स्कुल, कलेज र केही बिदेशी गरी विभिन्न निकायबाट खेलाडी दर्ता गरिएको आयोजकले जनाएको छ । 

प्रतियोगिता भोलि शनिबार बिहान ७ बजे दरबारमार्गबाट सुरु भएर भद्रकाली, रत्नपार्क, जमल, दरबारमार्ग,  केशल महल, लैनचौर, लाजिम्पाट, महाराजगन्ज, बालुवाटार, नक्साल, जय नेपाल हुदै पुन दरबारमार्गमा पुगेर समापन हुने आयोजकले जानकारी दिएको छ । 

प्रतियोगिताको विधागततर्फका विजेताले ६० हजार, दोस्रोले ३० हजार, तेस्रोले १५ हजार, चौथोंले १० हजार, पाँचौंले ५ हजार नगद पुरस्कार प्राप्त गर्नेछन् ।

दौडमा १० किलोमिटरको कोर्ष रेकर्ड कायम गर्ने खेलाडीलाई थप नगद १० हजार रुपैयाँ प्रदान गरिने आयोजक संस्थाका सचिव राजन खत्रीले जानकारी दिएका छन् ।