इन्टरका खेलाडीले अत्याधिक खुसी मनाएको बायर्नको आरोप

काठमाडौं। बायर्न म्युनिखका स्टार स्ट्राइकर ह्यारी केनले इन्टर मिलानका खेलाडीमाथि पहिलो लेगको जितपछि अत्यधिक खुसी मनाएको आरोप लगाएका छन्।

च्याम्पियन्स लिगको क्वार्टरफाइनलको पहिलो खेलमा इन्टरले बायर्नलाई २–१ ले पराजित गरेको थियो। बायर्नका प्रशिक्षक भिन्सेन्ट कम्पनीले पनि केनको भनाइलाई समर्थन गर्दै इन्टरका खेलाडीहरूको प्रतिक्रिया अतिशयोक्ति भएको बताए।

‘उनीहरूले खेल जितेझैं उत्सव मनाए,’ पहिलो लेगपछि केनले भनेका थिए। तर मंगलबार उनले केही सम्झदारी देखाउँदै भने,‘सायद त्यो क्षण भावनामा भनिएको थियो। यदि हामी भोलि जित्यौं भने हामीले पनि खुसी मनाउनेछौं। फुटबल त्यही हो।’

इन्टरका मिडफिल्डर हेनरिक म्खितारियनले त्यस आरोपलाई अस्वीकार गरेका छन्। ‘हामीलाई थाहा छ, पहिलो खेलपछि मात्र सामान्य खुसी मनाएका थियौं। त्यो ठूलो उत्सव थिएन,’ उनले मंगलबार पत्रकार सम्मेलनमा भने, ‘बाहिरी मानिसहरूले धेरै कुरा गर्छन्, तर हामी हाम्रो खेलमा ध्यान केन्द्रित गरिरहेका छौं।’

पहिलो लेगमा लुटारो मार्टिनेजले गोल गर्दै इन्टरलाई अग्रता दिलाएका थिए। तर, पहिलो हाफको अन्तिम पाँच मिनेट बाँकी रहँदा थोमस मुलरले बराबरी गोल गरे। त्यसपछि ८८औं मिनेटमा डेभिडे फ्राटेसीको गोल गर्दै इन्टरलाई २–१ को जित दिलाए। जर्सी खोलेर उत्सव मनाएको कारण फ्राटेसीले पहेँलो कार्ड पाए। यिनै कारणले बायर्नले आपत्ति जनाएको हो।