चर्काचर्कीपूर्ण खेलमा १० वटा पहेंलो कार्ड, दुई गोल भिएआरले अस्वीकृत

काठमाडौं। एन्जो फर्नान्डेजले दोस्रो हाफमा हेडर गोल गरेसँगै प्रिमियर लिगमा टोटनह्याममाथि १–० को जित निकालेको चेल्सी च्याम्पियन्स लिग छनोटमा फर्किएको छ।

स्ट्याम्फोर्ड ब्रिजमा बिहीबार राति भएको लन्डन डर्बीमा अर्जेन्टिनी मिडफिल्डर फर्नान्डेजले खेलको ५०औं मिनेटमा कोल पामरको क्रसमा डिफेन्डरलाई छलेर हेडरमार्फत गोल गरे।

यो जितसँगै न्यूक्यासल र म्यानचेस्टर सिटीलाई उछिन्दै चेल्सी लिग तालिकाको चौथो स्थानमा पुगेको छ।  लिगमा अब आठ चरणका खेलहरू बाँकी छन् र यसपटक शीर्ष पाँच टोली च्याम्पियन्स लिगमा छनोट हुने सम्भावना छ।

यो प्रतिस्पर्धा पछिल्ला वर्षहरूमा सधैं रोमाञ्चक रहँदै आएको छ। यो पटक पनि दुई टोलीबीच चर्काचर्कीका साथै १० वटा पहेंलो कार्ड र दुईवटा गोल भिएआरले अस्वीकृत गरेको दृश्य देखियो।

५६औं मिनेटमा मोइसेस काइसेडोले उत्कृष्ट भलीमार्फत गोल गरे। तर, भिएआर चेकपछि लिभाइ कोलविल अफसाइडमा देखिएको कारण गोल रद्द गरियो।

त्यसपछि टोटनह्यामका वैकल्प खेलाडी पापे सारले लामो दूरीबाट प्रहार गरेर गोल गरे। तर, उनले काइसेडोलाई फल गरेका कारण त्यो गोल पनि मान्य भएन र सारलाई पहेंलो कार्ड देखाइयो।

टोटनह्यामका कप्तान सन हेउङ मिनको प्रहारलाई चेल्सीका गोलकिपर रोबर्ट सान्चेजले उत्कृष्ट बचाउ गरे। ‘चेल्सीका मुख्य प्रशिक्षक एन्जो मारेस्काले भने, हामी ठूलो टिम बन्न चाहन्छौं भने कहिलेकाहीं फोहोर र कुरुप तरिकाले पनि जित्न सिक्नुपर्छ। म अहिले खुसी छु।’

टोटनह्याम भने तालिकाको १४औं स्थानमै अडिएको छ। युरोपा लिगको क्वार्टरफाइनलमा पुगेको टिमको ध्यान अब लिगको प्रदर्शनभन्दा युरोपेली प्रतियोगितातर्फ केन्द्रित देखिन्छ। मुख्य प्रशिक्षक एन्जे पोस्टेकोग्लूमाथि भने दबाब बढेको छ।

‘मेरो वैकल्पिक खेलाडी मैदानमा आएपछि समर्थकहरूले हुटिङ गरे, यो पहिलो पटक होइन,’ पोस्टेकोग्लूले भने,‘उनीहरूलाई बू गर्न पाइन्छ।’ यो खेलमा चेल्सीका स्ट्राइकर निकोलस ज्याक्सनले दुई महिनापछि चोटमुक्त हुँदै टोलीमा पुनरागमन गरेका छन्।