इन्टरको ‘ट्रेबल’ जित्ने सपना जीवितै
काठमाडौं। इन्टर मिलानको ‘ट्रेबल’ जित्ने सपना जीवितै छ भने एसी मिलानको युरोपियन प्रतियोगितामा स्थान बनाउने आशा पनि कायमै छ। बुधबार भएको इटालियन कप सेमिफाइनलको पहिलो लेगमा यी दुई सिटी प्रतिद्वन्द्वीहरू १–१ को बराबरीमा रोकिए।
मिलानका पूर्वखेलाडी हाकान चाल्हानोग्लुले ६७औं मिनेटमा बराबरी गोल गर्दै इन्टरलाई खेलमा फर्काए। त्यसअघि मिलानका फरवार्ड ट्यामी अब्राहमले दोस्रो हाफको दोस्रो मिनेटमै गोल गर्दै रोसोनेरीलाई अग्रता दिलाएका थिए।
मंगलबार भएको अर्को सेमिफाइनल खेलमा बोलोन्याले एम्पोलीलाई ३–० ले पराजित गरेको थियो। सेमिफाइनलका दोस्रो लेग खेल अप्रिल २३ र २४ मा हुनेछ।
इन्टरको ट्रेबल जित्ने लक्ष्य
इन्टर जोसे मोरिन्होको प्रशिक्षणमा सन् २०१० मा ट्रेबल जितेको इतिहास दोहोर्याउन खोजिरहेको छ। अहिले इन्टर सिरी ‘ए’मा डिफेन्डिङ च्याम्पियनका रूपमा तीन अंकको अग्रता लिएर दोस्रो स्थानमा रहेको नापोलीभन्दा अघि छ। यसैबीच मंगलबार इन्टरले च्याम्पियन्स लिग क्वार्टरफाइनलको पहिलो लेगमा बायर्न म्युनिखको मैदानमा प्रतिस्पर्धा गर्दैछ।
मिलान पछिल्लो समय कमजोर प्रदर्शन गर्दै आएको छ। पछिल्ला ६ लिग खेलमध्ये मात्र दुई जित हात पार्दा टोली नवौं स्थानमा झरेको छ। इटालियन कप जितेमा मिलानले युरोपा लिगमा स्थान पाउनेछ।
दोस्रो हाफको सुरुआतमै इन्टरका मिडफिल्डर डाभिडे फ्राटेसीले युसुफ फोफानासँग बल खोस्न खोज्दा ट्यामी अब्राहमसम्म पुग्यो। अब्राहमले उत्कृष्ट प्रहार गर्दै बललाई पोस्टको बाँया तल्लो कुनामा पठाए।
तर, २० मिनेटपछि चाल्हानोग्लुले २० यार्ड दूरीबाट शक्तिशाली प्रहार गर्दै इन्टरका लागि बराबरी गोल गरे। अब दोस्रो लेग अप्रिलको अन्त्यमा हुनेछ, जहाँ यी दुई टोली इटालियन कपको फाइनल प्रवेशका लागि पुनः भिड्नेछन्।
