तनावपूर्ण खेलमा ललितपुरको जित
काठमाडौं। तनावपूर्ण खेलमा जोनाथन कान्टिलानाको दुई गोलसँगै साबिक विजेता ललितपुर सिटी नेपाल सुपर लिग (एनएसएल) मा फर्किएको छ।
पहिलो खेलमा पहिलो संस्करणको विजेता काठमाडौं रेजर्ससँग दुई गोलको अग्रता जोगाउन नसकेको ललितपुरले आफ्नो दोस्रो खेलमा पोखरा थन्डर्सलाई ३–२ ले पराजित गरेको हो।
योसँगै ललितपुर दुई खेलबाट चार अंक जोड्दै अंकतालिकाको शीर्ष स्थानमा उक्लिएको छ। पोखरा भने अझै अंकविहीन छ। पहिलो खेलमा पोखरालाई एफसी चितवनले २–० ले पराजित गरेको थियो।
ललितपुरलाई जित दिलाउन जोनाथनबाहेक इमोह इजिकेलले एक गोल थपे। पोखराका समीर तामाङ र जोय आइडुले गरेको गोल सान्त्वना रह्यो।
खेलको ११औं मिनेटमै ललितपुरले सुरुआती अग्रता लियो। जोनाथनले कर्नरबाट प्रहार गरेको बल प्रिसोको खुट्टामा डिफ्लेक्ट हुँदै जाली चुम्यो।
४२औं मिनेटमा मार्की प्लेयर समीरको गोलसँगै पोखरा खेलमा फर्कियो। आयुष घलानले पेनाल्टी बक्सबाट उपलब्ध गराइदिएको बललाई नवयुग श्रेष्ठले हेडर गरेका थिए। तर, उक्त बललाई जेफ्रे बाल्टुसले राम्रोसँग नियन्त्रणमा लिन नसक्दा समीरले रिबाउन्डमा गोल गर्ने अवसर प्राप्त गरे।
इन्जुरी समयमा इजिकेले गोल गर्दै ललितपुरलाई पुन: अग्रता दिलाए। मैदानको मध्यभागबाट जोनाथनले दिएको लामो क्रसमा इजिकेलले गोल गरेका हुन्।
७५औं मिनेटमा भने जोनाथन आफैंले गोल गरे। साइट एन्ड साइडबाट सनीश श्रेष्ठले उपलब्ध गराइदिएको बललाई जोनाथनले सहजै गोल गरे। योसँगै ललितपुरले ३–१ को अग्रता लियो।
योसँगै जोनाथन जारी प्रतियोगिताका सर्वाधिक गोलकर्ताको सूचीमा शीर्ष स्थानमा उक्लिएका छन्। उनले गोलसंख्या तीन पुर्याएका छन्। उनलाई एक खेल कम खेलेका धनगढी एफसीका अहमद हिजाजीले पछ्याइरहेका छन्। उनले पहिलो खेलमा बुटवल लुम्बिनी एफसीविरुद्धको दुई गोल गरेका थिए।
८१औं मिनेटमा पोखराका समीरको क्रसमा कप्तान नवयुगले प्रहार गरेको बल ललितपुरका गोलकिपर जेफ्राले उत्कृष्ट बचाउन गरे। तर, पोखराका खेलाडीहरूले बलले लाइन पार गरिसकेको भन्दै गोलले मान्यता पाउनुपर्ने अडान राखेका थिए। तर, रेफ्री नवीन्द्र महर्जनले गोलको मान्यता दिएनन् । त्यसपछि नवयुग र समीर रेफ्रीसँग विवादमा उत्रिएका थिए।
त्यहीबेला पोखराका किट पार्टनर जि स्पोर्ट्सका प्रमुख सुन्दर थापा रेफ्रीलाई हात नै हाल्न झम्टिएका थिए। उनलाई सम्झाउन एनएसएलका कम्पिटिसन डिरेक्टर सञ्जीव मिश्र नै पुगेका थिए। तर, सञ्जीवमाथि नै हातपात भएपछि अवस्था तनावपूर्ण भएको थियो।
पोखराको अफिसिलय बेन्च लिस्टमा नामसम्म नभएका उनलाई बाहिर निकाल्न सुरक्षाकर्मी प्रयोग गर्नुपरेको थियो।
इन्जुरी समयको नवौं मिनेटमा जोयले गोल गर्दै पोखरालाई ३–२ को स्थितिमा ल्याए। समीरले दिएको पासमा उनले गोल गरेका थिए। तर, समय अभावका कारण त्यसपछि पोखरा खेलमा फर्किन सकेन।
