विश्वकप छनोटमा वेल्सको सानदार सुरूआत

काठमाडौं। वेल्सले शनिबार काजाकिस्तानलाई ३–१ ले पराजित गर्दै २०२६ विश्वकप छनोटको सानदार सुरूआत गरेको छ। उता, एर्लिङ हालान्डको गोलसहित नर्वेले मोल्डोभालाई ५–० ले हरायो।

वेल्स दोस्रो पटक लगातार विश्वकप खेल्ने लक्ष्यमा अघि बढिरहेको छ। क्रेग बेलामीको टोलीले कार्डिफमा भएको खेलमा संघर्षपूर्ण काजाकिस्तान टोलीलाई हरायो।

खेलको नौं मिनेटमा लिड्स युनाइटेडका विंगर ड्यानियल जेम्सको प्रहार काजाकिस्तानका खेलाडीलाई लागेर गोलमा परिणत भयो। फिफा वरीयताको ११०औं स्थानमा रहेको काजाकिस्तानले खेलको ३०औं मिनेटमा पेनाल्टीबाट बराबरी गोल फर्कायो। अस्खात तागाइबर्गेनले कोन्नर रोबर्ट्सको ह्यान्डबलपछि पेनाल्टीलाई गोलमा परिणत गरे।

दोस्रो हाफमा वेल्सका कप्तान बेन डेभिसले हेडरमार्फत अग्रता पुनःस्थापित गरे। खेलको अन्त्यतिर रब्बी माटोन्डोले गोल गर्दै वेल्सको जित सुनिश्चित गरे।

‘हामीले यो खेलमा राम्रो सुरूआत गर्नुपर्छ भनेर साता दिनभर कुरा गरिरहेका थियौं र आज त्यही गर्न सफल भयौं,’ जेम्सले भने। वेल्स अब अर्को खेलका लागि उत्तर म्यासेडोनिया यात्रा गर्दैछ।

उत्तर म्यासेडोनियाले लिचटेन्स्टाइनलाई ३–० ले हरायो। पहिलो हाफमै अलेक्जान्डर ट्राजकोभ्स्की र विसार मुसलियुले गोल गरे भने गिरोना फरवार्ड बोजन मियोभ्स्कीले खेलको अन्त्यतिर तेस्रो गोल थपे।

समूहका मुख्य दाबेदार बेल्जियमले भने जुन महिनासम्म आफ्नो अभियान सुरु गर्ने छैन।