नाथान करिब ११ हप्ता मैदानबाहिर रहने

काठमाडौं। म्यानचेस्टर सिटीका डिफेन्डर नाथान एके खुट्टाको शल्यक्रियापछि करिब ११ हप्ता मैदानबाहिर रहने भएका छन्।

सिटीका प्रशिक्षक पेप ग्वार्डिओलाले शनिबार नटिङ्घम फरेस्टविरुद्धको प्रिमियर लिग खेलअघि पत्रकारहरूसँग कुरा गर्दै भने, ‘जब शल्यक्रिया गरिन्छ, यसको अर्थ गम्भीर नै हुन्छ।’

नेदरल्यान्ड्सका अन्तर्राष्ट्रिय खेलाडी एकेले मंगलबार शल्यक्रिया गराएका थिए। प्लेमाउथ अर्गाइलविरुद्ध एफए कपको पाँचौं चरणको खेलमा घाइते भएपछि उनले चोट झन् बल्झिएको महसुस गरेका थिए।

सिटीले शनिबार नटिङ्घम फरेस्टको मैदानमा यात्रा गर्दैछ, जहाँ दुबै टोली च्याम्पियन्स लिगको लागि स्थान सुरक्षित गर्ने लक्ष्यमा छन्। फरेस्ट ४८ अंकसहित लिगको तेस्रो स्थानमा छ भने सिटी ४७ अंकसहित चौथो स्थानमा छ।

ग्वार्डिओलाले भने, ‘धेरै क्लबहरू च्याम्पियन्स लिगमा पुग्न संघर्ष गरिरहेका छन्। यदि हामी पुग्न सक्दैनौं भने यसको अर्थ हामी राम्रो खेल्न सकेनौं र अन्य टोलीहरूले यसको योग्य छन् भन्ने बुझिन्छ।’

उनले थपे, ‘ठूला क्लबहरूमा जहिल्यै दबाब हुन्छ। तपाई जुनसुकै प्रतियोगिताका लागि खेल्दै हुनुहोस्, उत्कृष्ट प्रदर्शन गर्न आफैंमा दबाब सिर्जना गर्नुपर्छ। हाम्रो मुख्य लक्ष्य शीर्ष चारमा पुग्नु हो शनिबार हामीले त्यसलाई सुरक्षित गर्ने अर्को अवसर पाउनेछौं।’