गोलकिपर उषा नायक बन्दा पुलिस सेमिफाइनलमा
इलाम। गोलकिपर उषा नाथ टाइब्रेकरमा नायक बन्दा विभागीय टोली नेपाली पुलिस क्लब आइतबार इलाममा जारी अन्तर्राष्ट्रिय आमन्त्रण महिला गोल्डकपको सेमिफाइनलमा प्रवेश गरेको छ।
बागमती युथ क्लबल टाइब्रेकरमा ३–१ ले हराउँदै पुलिसले अन्तिम चारमा स्थान बनाएको हो। पुलिसलाई जित दिलाउन गोलकिपर उषाले बागमतीको दुई वटा प्रहारलाई बचाएकी थिइन्।
पुलिसले खेल अवधिमा पाएको पेनाल्टीलाई सदुपयोग गर्न नसक्दा जितका लागि टाइब्रेकरसम्म पुग्नु पर्यो। खेलको ५५औं मिनेटमा बागमतीको खेलाडीको डिबक्सभित्र ह्रयान्डबल भएपछि पाएको पेनाल्टीलाई पूजा रानाले सदुपयोग गर्न सकिनन् उनको प्रहार आकासिएको थियो ।
निर्धारित समयमा दुवै टिमले गोलरहित बराबरी खेलेपछि टाइब्रेकरतर्फ धकेलिएको थियो। पुलिसका रेविका पाण्डे, बिर्सना चौधरी र गोलकिपर उषा नाथले गोल गरिन्। कप्तान निरु थापाको प्रहार आकासिएको थियो।
यस्तै, बागमतीका सलोनी रानामगरको प्रहार मात्र गोलमा परिणत भयो। सेसिहाङमा लिम्बूको प्रहार बाहिरिँदा विष्णुमाया बल र अञ्जली खवासको प्रहार पुलिसकी गोलकिपर उषाले रोकेकी थिइन्।
दुई प्रहार रोकेकी उषा प्लेयर अफ द म्याच बनिन्। उनलाई इलाम नगरपालिकाकी नगर उपप्रमुख विष्णु दाहालले नगद पाँच हजार रुपैयाँ प्रदान गरिन्। तेस्रो क्वार्टरफाइनलमा त्रिभुवन आर्मी फुटबल क्लबले डिफेन्डिङ च्याम्पियन मानेभञ्ज्याङ एफसी दार्जीलिङ भारतसँगखेल्नेछ।
फागुन २४ गते हुने फाइनल खेलको विजेताले नगद चार लाख र उपविजेता टिमले नगद दुई लाख रुपैयाँ प्राप्त गर्नेछ।
