ह्याट्रिक ‘ब्वाइ’ एमबाप्पे
काठमाडौं। रियल मड्रिडका स्टार खेलाडी किलियन एमबाप्पेले च्याम्पियन्स लिगमा आफ्नो तेस्रो ह्याट्रिक गर्दै क्लबलाई अन्तिम १६ मा पुर्याए।
रियलले बुधबार म्यानचेस्टर सिटीलाई ३–१ ले पराजित गरेको हो। योसँगै रियल समग्र ६–३ को जितसहित अगाडि बढ्न सफल भयो।
‘यो एक परिपूर्ण रात थियो,’ एमबाप्पेले भने, ‘हामी जित्न चाहन्थ्यौं र त्यसैअनुसार खेल्यौं। घरेलु समर्थकहरूका अगाडि उत्कृष्ट प्रदर्शन गर्यौं र जित हासिल गर्यौं। सिटीजस्तो कठिन टोलीविरुद्ध जित्न यसैगरी खेल्नुपर्छ।’
एमबाप्पे च्याम्पियन्स लिगको नकआउट चरणमा दुई ह्याट्रिक गर्ने चौथो खेलाडी बनेका छन्। यसअघि लिओनल मेसी, करिम बेन्जिमा र रोबर्ट लेवान्डोस्कीले पनि नकआउट चरणमा दुई ह्याट्रिक गरेका थिए।
क्रिस्टियानो रोनाल्डोको नाममा चार ह्याट्रिक छन्। एमबाप्पेले यसअघि सन् २०२१ मा बार्सिलोनाविरुद्ध र २०१९ मा क्लब ब्रुगेसविरुद्ध ह्याट्रिक गरेका थिए।
‘एमबाप्पेमा क्रिस्टियानोलाई जस्तै उपलब्धिहरू हासिल गर्ने गुण छ, तर धेरै मेहनत गर्नुपर्नेछ। किनभने रोनाल्डोले निकै उच्चस्तर राखेका छन्,’ रियलका प्रशिक्षक कार्लो एन्चेलोटीले भने।
मड्रिडका अर्को स्टार खेलाडी जुड बेलिङ्घमले पनि एमबाप्पेको प्रदर्शनको प्रशंसा गरे। ‘एमबाप्पे विशेष खेलाडी हुन्, सबैलाई थाहा छ। उनले बारम्बार प्रमाणित गरिरहेका छन्। उनी खेलाडी मात्र होइन, उत्कृष्ट व्यक्तित्व पनि हुन् र हामीले उनका गोलहरूबाट फाइदा उठाउनेछौं,’ उनले भने।
एमबाप्पेले रियल लागि आफ्नो उत्कृष्ट खेलमध्ये एक खेल खेलेको बताउँदै भने, ‘म यो विश्लेषण गर्न चाहन्न कि यो मेरो सर्वश्रेष्ठ खेल हो कि होइन। म मैदानमा उत्कृष्ट प्रदर्शन गर्न चाहन्छु। तर, आज हाम्रो टोलीको प्रदर्शन उत्कृष्ट रह्यो।’
आगामी चरणमा एमबाप्पे बायर लेभरकुजेनसँग होइन, एट्लेटिको मड्रिडसँग खेल्न चाहन्छन्। ‘साँचो कुरा भन्नुपर्दा म एट्लेटिको मड्रिडविरुद्ध खेल्न चाहन्छु। दुबै क्लब बलिया छन्। तर, जर्मनीको लामो यात्राभन्दा घरेलु टोलीसँग खेल्न सजिलो हुन्छ,’ उनले भने।
