न्युक्यासललाई घरेलु ट्रफीको पर्खाइ अन्त्य गर्ने अर्को अवसर
काठमाडौं। न्युक्यासल फेरि इङ्ग्लिस लिग कपको फाइनलमा पुगेको छ, जसले ७० वर्षदेखिको घरेलु ट्रफीको प्रतीक्षालाई अन्त्य गर्ने अर्को मौका मिलेको छ।
साउदी नियन्त्रणमा रहेको उत्तरपूर्वी क्लबले मंगलबार सेमिफाइनलको दोस्रो लेगमा आर्सनललाई २–० ले पराजित गर्दै समग्रमा ४–० को जित हासिल गर्यो। स्ट. जेम्स पार्कमा ज्याकब मर्फी र एन्थनी गार्डनले निर्णायक गोल गरे।
न्युक्यासलले मार्च १६ मा वेम्बली स्टेडियममा हुने फाइनलमा टोटनह्याम या लिभरपुलसँग खेल्नेछ। पहिलो लेगमा टोटनह्याम १–० अगाडि छ र फिर्ती खेल एनफिल्डमा बिहीबार हुनेछ।
साउदी अरेबियाको सार्वभौमिक सम्पत्ति कोषद्वारा सन् २०२१ मा न्युक्यासल किनिएकोदेखि पहिलोपल्ट ट्रफी जित्ने अवसर जुरेको हो। न्युक्यासलको अन्तिम ट्रफी सन् १९६९ को अस्तित्वमा नआएको इन्टर–सिटीज फेयर कप थियो। त्यसपछि हालको घरेलु उपाधि एफए कप सन् १९५५ जितेको थियो।
पछिल्लो पटक न्युक्यासलले सन् २०२३ लिग कपको फाइनलमा पुगे पनि म्यानचेस्टर युनाइटेडसँग २–० ले पराजित थियो। ‘त्यस्तो खेल खेल्दा हामी ठूला सपना देख्न सक्छौं,’ आर्सनलसँगको खेलपछि न्युक्यासलका कप्तान ब्रुनो गुइमाराइसले भने, ‘मेरो पहिलो सिजनमा कप्तानको रूपमा ट्रफी उठाउनु अद्भुत हुनेछ, त्यो मेरो सपना हो।’
आर्सनलले आइतबार प्रिमियर लिगमा म्यानचेस्टर सिटीलाई ५–१ ले हराएको थियो। सोही लय दोहोर्याउने लक्ष्यमा मैदान उत्रिएको आर्सनलले अघिल्लो महिना एमिरेट्स स्टेडियममा न्युक्यासलसँगको पहिलो लेगमा बेहोरेको २–० को हारको बदला लिने आशा राखेको थियो।
खेलको प्रारम्भमा मिकेल आर्टेटाको टोलीले स्टे. जेम्स पार्कको जीवन्त माहौल सम्हाल्न नसक्दा डिफेन्समा केही कमजोरी देखियो। चार मिनेटमै लगभग गोल खाने स्थिति उत्पन्न भयो। एलेक्जान्डर इसाकले टप कर्नरमा गोल गर्ने प्रयास गरे। तर, भिडियो समीक्षापछि गोल अफसाइडका कारण त्यो गोल रद्द गरियो।
१९औं मिनेटमा न्युक्यासलले अग्रता समात्यो। इसाकले प्रहार गरेको बल जोकब मर्फीले रिबाउन्डमा सफलतापूर्वक गोलमा परिणत गरे। हाफटाइम अघि गेब्रियल मार्टिनेलीले मांसपेशी चोटका कारण मैदान छोडे। त्योसँगै आर्सनलको खेलमा फर्किनको सम्भावना अझै टाढा रह्यो। त्यसैबीच गार्डनले दोस्रो गोल गर्दै न्युक्यासललाई फाइनलमा स्थान सुनिश्चित गराए।
दुईपल्ट लिग कप जितेको आर्सनलले सन् २०१८ पछि फाइनलमा पुग्ने आशा राखेको थियो। तर, न्युक्यासलले फेरी आर्सनललाई धक्का दियो। खेलपछि गार्डनले आर्सेनलप्रति हल्का टिप्पणी गर्दै भने, ‘हामीलाई अहिले नम्र रहनु आवश्यक छ। यो ठूलो अवसर हुनेछ।’
