२०३१ सम्म रोनाल्ड बार्सिलोनामा रहने

काठमाडौं। उरुग्वेका सेन्ट्रल डिफेन्डर रोनाल्ड अराउजोले बार्सिलोनासँग आफ्नो सम्झौता आगामी ६ सिजनका लागि बढाएका छन्। यससँगै उनी युभेन्ट्स जाने चर्चा अन्त्य भएको छ।

बार्सिलोनाले बिहीबार घोषणा गर्दै २५ वर्षीय अराउजोसँग सन् २०३१ को जुनसम्मका लागि सम्झौता भएको जनाएको छ। अराउजो सन् २०१८ मा बार्सिलोना आएका थिए। सुरुमा उनी क्लबको बी टोलीमा थिए भने २०२०–२१ सिजनदेखि मुख्य टोलीमा स्थायी रूपमा समावेश भए।

बार्सिलोनाको पहिलो टोलीका लागि उनले १५४ खेल खेलेका छन्, जसमा आठ गोल र ६ असिस्ट गरेका छन्। उनले क्लबलाई एक स्पेनिस लिग र एक कोपा डेल रे उपाधि जिताउन मद्दत गरेका छन्।

यस सिजन अराउजोलाई दोस्रो कप्तानको भूमिकामा बढुवा गरिएको छ, जसले क्लबमा उनको महत्त्वलाई झल्काउँछ।