हार्ने ठाउँ अझै बाँकी छ र?

काठमाडौं। म्यानचेस्टर युनाइटेडका मुख्य प्रशिक्षक रुबेन अमोरिमले क्लबको पछिल्लो हारपछि एक कटु यथार्थ स्वीकार गर्दै भने, ‘हामी इतिहासमा सबैभन्दा खराब अवस्थामा छौं।’ इङ्लिस प्रिमियर लिगअन्तर्गत आइतबार राति भएको खेलमा युनाइटेड ब्राइटनसँग ३–१ गोलअन्तरले पराजित भएको थियो।

यो नतिजासँगै युनाइटेडलाई नै प्रश्न हुन्छ– योभन्दा हार्ने ठाउँ अझै बाँकी छ र? अमोरिम स्वीकार गर्दै भन्छन्, ‘हामीले यस खराब नतिजालाई स्वीकार गर्नुपर्छ र परिवर्तन गर्नुपर्छ।’ यो सन्देश स्पष्ट हो– युनाइटेडमा अब स्वीकारोक्ति र परिवर्तनको आवश्यकता।

२० पटकको इङ्लिस च्याम्पियन रहिसकेको युनाइटेड अहिले २६ अंक जोड्दै तालिकामा १३औं स्थानमा छ। र, रेलिगेसन जोननजिक छ। यो स्थिति क्लबका समर्थक र प्रशिक्षक दुबैका लागि चिन्ताजनक हो। गत नोभेम्बरमा पूर्वप्रशिक्षक एरिक टेन हागको स्थानमा नियुक्त भएयता अमोरिमको प्रशिक्षणमा युनाइटेडले १५ खेल खेलेको छ। तीमध्ये सात खेलमा हार बेहोरेको छ। यो आँकडाले उनको प्रशिक्षकीय क्षमतामा प्रश्न उठाउँछ र क्लबको रणनीतिमा परिवर्तन गर्न पुनर्विचार गर्नुपर्ने संकेत देखाउँछ।

प्रिमियर लिगको तथ्यांक राख्ने ओप्टाका अनुसार सिजनको पहिलो १२ घरेलु लिग खेलमा ६ हार युनाइटेडको सन् १८९३–९४ यताकै सबैभन्दा खराब प्रदर्शन हो। यो तथ्यले युनाइटेडको ऐतिहासिक सफलता र वर्तमान संकटबीचको गहिरो खाडललाई प्रस्ट्याउँछ।

‘हामीसँग घरेलु मैदान र प्रिमियर लिगमा धेरै खेल हारेको जस्ता सबै खराब रेकर्डहरू छन्,’ अमोरिमले भने, ‘त्यसैले हामी वास्तवमै कमजोर प्रदर्शन गरिरहेका छौं र हामीले खेल जित्न आवश्यक छ, यति मात्र हो।’

पूर्वप्रशिक्षक हागले युनाइटेडमा साढे दुई वर्ष आफ्नो अनुभव खन्याए। उनले दुई घरेलु कप जिते। तर, प्रिमियर लिग उनका लागि फलदायी रहेन। सिजनको सबैभन्दा खराब सुरुआत पछि उनले गत अक्टोबरमा ठूलो मूल्य चुकाउनु पर्‍यो। टोली १४ औं स्थानमा रह्यो र आफ्नो सुरूआती नौ लिग खेलमध्ये चार गुमायो। 

यो युनाइटेडको पछिल्लो ३४ वर्षको सबैभन्दा खराब लिग अभियान थियो। त्यसैले युनाइटेडले स्थिर प्रदर्शन र दीर्घकालीन रणनीतिमा गहिरो पुनर्विचार गर्नुपर्ने आवश्यकता औंल्यायो। फलतः हाग बर्खास्त भए र ओमरिम भित्रिए। स्पोर्टिङ लिस्बनलाई दुई पोर्चुगिज लिग उपाधि जिताएका प्रशिक्षक भित्र्याएसँगै युनाइटेडले आफ्नो क्लब पुनर्जीवित हुने अपेक्षा गरेको थियो। तर, उनको आगमनले पनि युनाइटेडमा अपेक्षित सुधार आउने संकेत देखिएको छैन।

अनफिल्ड प्रदर्शन निरन्तर निराशाजनक छ। एफए कपमा आर्सनलविरुद्ध पेनाल्टी सुटआउटमा जित हासिल गर्नुबाहेक युनाइटेडले सबै प्रतियोगितामा पछिल्ला आठमध्ये एक खेलमा मात्र जित हात पारेको छ।

‘कल्पना गर्नुहोस् युनाइटेड समर्थकका लागि यो के हो। कल्पना गर्नुहोस् मेरो लागि यो के हो?,’ अमोरिमले भने,‘त्यसैले हामीले नयाँ नयाँ प्रशिक्षक पाइरहेका छौं। यो परिवर्तनले पनि अझै धेरै खेलमा हार बेहोरिरहनु परेको छ।

ब्राइटनका लागि यान्कुबा मिन्टेह, काओरु मितोमा र जर्जिनियो रुटरले गोल गर्दै ओल्ड ट्राफोर्डमा युनाइटेडविरुद्ध लगातार तीन सिजनमा तेस्रो जित सुनिश्चित गरे। अमोरिमले युनाइटेडमा पदभार ग्रहण गरेदेखि विंगब्याक प्रणाली लागू गरेका छन्, जुन खेलाडीहरूले आफू अनकूल बनाउन संघर्ष गरिरहेको देखिन्छ। यो रणनीतिक परिवर्तनको प्रभावले नै युनाइटेडको समस्या चुलिएको देखिन्छ। तर, उनी आफ्नो रणनीति परिवर्तन गर्ने मुडमा देखिँदैनन्।

‘जे सुकै नतिजा आए पनि म आफ्नो रणनीति परिवर्तन गर्दिन। यही रणनीतिमा खेलिरहे हामी एक दिन सफल हुन सक्छौं भन्ने मलाई विश्वास छ। तर, हामीले यो खराब क्षणलाई पार गर्न आवश्यक छ। किनभने म भर्खरैको परिस्थितिमा त्यति ख्याल गर्दिन,’ उनले भने।

अमोरिमको यो धारणा स्पष्ट छ– संकटको घडीमा आत्मविश्लेषण र पुनर्संरचनाको आवश्यकता छ। तर, उनले आफ्ना रणनीतिमा विश्वास राख्दै भविष्यमा सुधारको लागि प्रतिबद्धता जनाएका छन्। यो कठिन यात्रामा युनाइटेडका समर्थकहरूका लागि धैर्य र प्रतिबद्धताको परीक्षा बन्नेछ।