अनिताको ह्याट्रिक, पुलिसको पोस्टमा आधा दर्जन गोल

काठमाडौं। कप्तान अनिता बस्नेतको ह्याट्रिकसँगै एपिएफ क्लब एन्फा राष्ट्रिय महिला लिगअन्तर्गत फाइनल राउन्डमा शीर्ष स्थानमा उक्लिएको छ।  

एन्फा कम्प्लेक्समा बिहीबार सम्पन्न विभागीय डर्बीमा एपिएफले नेपाल पुलिस क्लबलाई ६-० ले पराजित गरेको हो। लगातार तेस्रो जित निकालेको एपिएफले तीन खेलबाट ९ अंक जोडेको छ।

पहिलो पराजय बेहोरेको पुलिसको चार खेलबाट सात अंक छ। एपिएफलाई जित दिलाउन सरु लिम्बुले दुई र रेनुका नगरकोटेले एक गोल थपे।

खेलको ११औं मिनेटमा अनिताको गोलमार्फत एपिएफले अग्रता लिएको थियो। ३७औं मिनेटमा रेनुकाले टोलीको अग्रता दोब्बर बनाइन्। ८६ र ८७औं मिनेटमा सरुले गोल गर्दा एपिएफको अग्रता ४-० मा पुगेको थियो। इन्जुरी समयमा दुई गोल गर्दै अनिताले ह्याट्रिक पूरा गरिन्।