लिभरपुलका नायक एलिसन

काठमाडौं। लिभरपुलका गोलकिपर एलिसन बेकर मंगलबार चोटबाट फर्किएपछि जिरोनाविरुद्धको च्याम्पियन्स लिग खेलमा उत्कृष्ट प्रदर्शन गरे। उनको योगदानले लिभरपुललाई १–० को जित दिलाउन महत्त्वपूर्ण भूमिका खेल्यो। जसमा प्रशिक्षक अर्ने स्लटले प्रशंसा गर्दै एलिसनको प्रभावलाई सम्मान गरे।

अक्टोबर ५ देखि ह्यामस्ट्रिंग चोटका कारण मैदानबाहिर रहेका एलिसनको अनुपस्थितिमा बैकल्पिक गोलकिपर काओइमिन केलेहरले राम्रो प्रदर्शन गरेका थिए। तर, एलिसनले आफ्नो क्षमता पुन: प्रमाणित गरेका छन्। खेलमा उनले निर्णायक बचाउ गरे, जसले मोहम्मद सलाहको पेनाल्टीमार्फत लिभरपुललाई विजय दिलाउन नायकी भूमिका खेले।

प्रशिक्षक स्लटले भने, ‘एलिसन दुई महिनासम्म बाहिर थिए जस्तो लागेन। उनले धेरै बचाउ गर्नुपर्‍यो। तर, उनले आफू नम्बर एक रहेको प्रमाणित गरे।’

डिफेन्डर एन्डी रोबर्टसनले पनि एलिसनको प्रशंसा गरे। पहिलो हाफमा एलिसनले एलेजान्ड्रो फ्रान्सिस र मिगुएल गुटिरेजका खतरनाक प्रहारलाई रोक्दै खेल बराबरीमा राखेका थिए। यद्यपि, रोबर्टसनले पहिलो हाफमा प्रतिद्वन्द्वीलाई धेरै अवसर दिएकोमा असन्तुष्टि व्यक्त गरे। उनले भने, ‘एलिसन केही समयका लागि बाहिर थिए, तर उनले आफू उत्कृष्ट फर्ममा रहेको देखाएका छन्। तर, हामीले अझ राम्रो नियन्त्रण गर्नुपर्छ र यति धेरै ग्याप छोड्न हुँदैन। विशेषगरी पहिलो हाफमा हाम्रो खेल अलि अव्यवस्थित भयो।’

यो जितसँगै लिभरपुलले प्रतियोगितामा आफ्नो प्रभावशाली प्रदर्शन जारी राखेको छ। अपराजित रहँदै शीर्ष स्थानमा पुगेको लिभरपुलको १८ अंक छ।