पुनर्जीवित हुन खोज्दै रियल
काठमाडौं। रियल मड्रिडका ठूला स्टारहरूले मंगलबारको रात उच्च प्रदर्शन गर्दै च्याम्पियन्स लिगमा खस्कँदो लयलाई पुनर्जीवित गर्दै स्पेनिस जाइन्टलाई रोमाञ्चक जित दिलाए।
इटालियन लिग लिडर एटलान्टाविरुद्ध ३–२ को रोमाञ्चक खेलमा केलियन एमबाप्पे, भिनिसियस जुनियर र जुड बेलिङ्घमले गोल गरे। यद्यपि, अन्तिम समयमा माटेओ रेटेगुइले गोलको सुनौलो मौका पाए पनि रियलले आफ्नो जित सुरक्षित राख्न सफल भयो।
रियलको यो जित लिग चरणमा तेस्रो हो, जसले १५ पटकको च्याम्पियनलाई १८ औं स्थानमा उक्ल्याएको छ। यस जितपछि प्लेअफका लागि रियलले आफ्नो सम्भावनालाई बलियो बनाएको छ। ‘यो निकै महत्त्वपूर्ण जित हो। यहाँ सबैले जित्न सक्दैनन्। हामीले कडा परिश्रम र प्रतिस्पर्धा गर्यौं। च्याम्पियन्स लिगमा सफलताका लागि कठिनाइ झेल्नुपर्छ,’ रियलका प्रशिक्षक कार्लो एन्सेलोट्टीले भने।
उनले थपे, ‘शीर्ष आठमा पुग्न अझै चुनौती बाँकी छ, तर अझै दुई खेल खेल्न बाँकी छ।’ यसैबीच लिभरपुलले जिरोनामाथि १–० को जित निकाल्दै आफ्नो उत्कृष्ट लयलाई यात्रा कायम राखेको छ। पेरिस सेन्ट जर्मेन (पिएसजी) ले साल्जबर्गलाई ३–० ले हराउँदै २४औं स्थानमा स्थान सुरक्षित गरेको छ।
अन्य खेलमा बायर लेभरकुजेनले इन्टर मिलानलाई १–० ले हरायो भने लाइपजिगविरुद्ध ३–२ को जित निकाल्दै एस्टन भिल्ला तेस्रो स्थानमा उक्लियो।
च्याम्पियन्स लिगको संरचनाअनुसार शीर्ष आठ टोलीले सिधै अन्तिम १६ मा स्थान बनाउनेछन्। ९ देखि २४ औं स्थानका टोलीले प्लेअफ खेल्दै अर्को चरणमा प्रवेश गर्नेछन्। लिग चरणका सुरुका पाँच खेलमा तीन हार बेहोरेपछि रियल दबाबमा थियो। अफसिजनमा पिएसजीबाट आएका एमबाप्पेले सुरुआतमा संघर्ष गरे पनि मंगलबारको खेलमा उनले आफ्नो क्षमताको झल्को देखाए। खेलको १०औं मिनेटमा एमबाप्पेले आफ्नो बायाँ खुट्टाले बल नियन्त्रण गर्दै दायाँ खुट्टाले कमालको प्रहार गर्दै रियललाई १–० को अग्रता दिलाए।
यो २५ वर्षीय एमबाप्पेको च्याम्पियन्स लिगमा ५०औं गोल हो। लिओनल मेसिपछि सबैभन्दा कम उमेरमै यो ‘माइलस्टोन’ छुन उनी सफल रहे। तर, एमबाप्पे शारीरिक समस्याका कारण हाफटाइमअघि नै मैदानबाट बाहिरिए। चार्ल्स डी केटेलेयरले पेनाल्टीमार्फत खेल बराबरीमा ल्याए पनि दोस्रो हाफमा भिनिसियस जुनियर र जुड बेलिङ्घमले गोल गर्दै रियललाई ३–१ को अग्रता दिलाए।
खेलको अन्त्यतिर अडेमोला लुकम्यानले गोल गर्दै स्कोर ३–२ मा झारे पनि रियलले रेटेगुइको अन्तिम प्रयासलाई जोगाउँदै खेल जित्न सफल भयो।
