चितवनसँग हार्यो सुदूरपश्चिम
काठमाडौं। सुदूरपश्चिम रोयल्सले नेपाल प्रिमियर लिग (एनपिएल) मा पहिलो हार बेहोरेको छ। आइतबार सम्पन्न खेलमा चितवन राइनोजसँग सुदूरपश्चिम ३३ रनले पराजित भएको हो।
चितवनले दिएको १६५ रनको लक्ष्य पछ्याएको सुदूरपश्चिम १८.२ ओभरमा सबै विकेट गुमाउँदै १३१ रनमै समेटियो। सुदूरपश्चिम रोयल्सले यसअघिका तीन खेलमा प्रभावशाली प्रदर्शन गर्दै विराटनगर किङ्सलाई ९०, काठमाडौं गुर्खाजलाई ७३ र लुम्बिनी लायन्सलाई ४५ रनले पराजित गरेको छ।
अर्कोतर्फ कुशल मल्लको कप्तानीमा रहेको चितवन भने कर्णाली याक्ससँग ६ विकेटले पराजित भए पछि पुनरागमन गर्न सफल भएको हो। चितवनले काठमाडौं गुर्खाजलाई पाँच विकेट र पोखरा एभेन्जर्सलाई ८७ रनले पराजित गरेको थियो।
जितपश्चात् चार खेलबाट चितवनले ६ अंक पुर्याएको छ। तर, नेट रनरेटमा तेस्रो स्थानको चितवन समान अंक रहेको सुदूरपश्चिमसँग पछाडि छ। कुनै खेल नहारेको जनकपुर बोल्ड्स भने आठ अंकसहित शीर्ष स्थानमा छ।
सुदूरपश्चिम रोयल्सका इशाल पाण्डेले सर्वाधिक ३५ रन बनाए। २८ बल खेलेका उनले चार चौका र एक छक्का प्रहार गरे। यस्तै, ओपनर सैफ जैबले १८, स्कट कुग्गेलिजनले १६, ब्रान्डन म्याकमुलनले १३ र दिलप्रीत बाजवाले १२ रन बनाउनुबाहेक अन्यको प्रदर्शन राम्रो रहेन।
सुदूरपश्चिमलाई सस्तैमा समेट्न रिजन ढकाल, कुशल मल्ल, जान निकोल लोफ्टी इटन र अमर रौटेलाले समान दुई विकेट लिए। सोहेल तनवीर र रञ्जित कुमारको नाममा एक विकेट रह्यो।
त्यसअघि कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ थालेको चितवनले निर्धारित २० ओभरमा चार विकेट गुमाउँदै १६४ रन बनाएको थियो।
ओपनर हसन इसाखिल हसनसँगै ओपनिङमा उत्रिएका सन्तोष कार्की नौ रनमा आउट भए। तर, हसनले ५२ बलमा ६ चौका र तीन छक्कासहित ६५ रनको इनिङ्स खेले।
एनपिएलमा हसनको यो पहिलो अर्धशतक हो। विपिन रावल १७ र कप्तान कुशल मल्ल १३ रनमा आउट हुँदा रवी बोपाराले १८ बलमा दुई चौका र दुई छक्कासहित ३६ रनको योगदान दिए।
जान निकोल लोफ्टी इटन दुई र अमर रौटेला ६ रनमा अविजित रहे। सुदूरपश्चिमका स्कट कुग्गेलिजनले सर्वाधिक दुई विकेट लिए। ब्रान्डन म्याकमुलन, दीपेन्द्रसिंह ऐरी र सैफ जैबको नाममा समान एक विकेट रह्यो।
