दिल्ली पुगे केएल राहुल

काठमाडौं। विकेटकिपर तथा ब्याटर केएल राहुललाई दिल्ली क्यापिटल्सले भित्र्याएको छ। साउदी अरबको जेद्दाहमा जारी इन्डियन प्रिमियर लिग (आइपिएल) को मेगा अक्सनमा उनलाई दिल्लीले १४ करोड भारुमा किनेको हो।

उनलाई भित्र्याउन कोलकाता नाइट राइडर्स, रोयल्स च्यालेन्जर्स बैंग्लोर र चेन्नई सुपर किङ्स पनि इच्छुक थिए। चेन्नईबाहेक दिल्ली, कोलकाता र बैंग्लोर कप्तानको खोजीमा थिए।

तर, बैंग्लोर १० करोड ७५ लाखभन्दा माथि जान चाहेन। कोलकाताले १२ र चेन्नईले १३ करोड ७५ लाखसम्मको बिड लगाएका थिए। अन्तमा दिल्ली उनलाई १४ करोडमा भित्र्याउन सफल भएको हो।

उनले यसअघि उनले लखनऊ सुपर जायन्ट्सलाई ब्याक टू ब्याक प्लेअफमा पुर्‍याएका थिए। गत संस्करणमा भने लखनऊ लिग चरणबाटै बाहिरिएको थियो। त्योसँगै उनलाई लखनऊले हटाउन खोजेको थियो।