नेपालको पहिलो जितमा सुजनको ह्याट्रिक

काठमाडौं। सुजन डंगोलको ह्याट्रिकप्रेरित नेपालले साफ यु-१७ च्याम्पियनसिपमा पहिलो जित दर्ज गरेको छ।

भुटानको चाङ्लिमिथाङ रंगशालामा सोमबार नेपालले श्रीलंकालाई ४-० ले पराजित गरेको हो। समूह ‘बी’ मा रहेको नेपाल पहिलो खेलमा  पाकिस्तानसँग १-० ले पराजित भएको थियो। यो जितसँथै नेपालले सेमिफाइनल पुग्ने सम्भावना बढाएको छ।

दुवै खेलमा पराजित श्रीलंका भने प्रतियोगिताबाट बाहिरिएको छ। श्रीलंका पहिलो खेलमा घरेलु टोलीसँग ५-१ ले पराजित भएको थियो।

एकराज बिकको क्रसलाई हेडमार्फत गोल गर्दै सुजनले चौथो मिनेटमा नेपाललाई सुरुआती अग्रता दिलाएका थिए। त्यसको आठ मिनेटपछि सुजनले नै टोलीको अग्रता दोब्बर बनाए। यसपल्ट भने कप्तान सुवास बमले उनलाई सहज बनाइदिए।

कृष्णबहादुर आलेको थ्रु पासलाई नियन्त्रणमा लिँदै सुजनले ३०औं मिनेटमा ह्याट्रिक पूरा गरे। निर्धारित समय सकिन ६ मिनेट बाँकी रहँदा विज्ञान खड्काले गोल गर्दै नेपाललाई ४-० को सहज जित दिलाए।