नर्थ लन्डन डर्बीमा आर्सनललाई जित

काठमाडौं। इङ्लिस प्रिमियर लिगअन्तर्गत नर्थ लन्डन डर्बीमा टोटनह्यामलाई रोक्दै आर्सनलले शीर्ष स्थानको म्यानचेस्टर सिटीसँगको अंक दूरी छोट्टाएको छ। 

टोटनह्याम हटस्पर स्टेडियममा भएको खेलमा आर्सनलले १–० को जित हात पारेको हो। योसँगै चार खेलबाट १० अंक जोडेको आर्सनल दोस्रो स्थानमा उक्लिएको छ। समान खेल खेलेको सिटीले आर्सनलको भन्दा दुई अंक बढी जोडेको छ।

घरेलु समर्थकमाझ टोटनह्यामले खेलको अधिकांश समय आर्सनललाई दबाबमा राखेपनि गोल गर्न सकेन। तर, ६४औं मिनेटमा ग्याब्रियल म्याग्लाहेसले गोल गर्दै आर्सनललाई अग्रता दिलाए।

बुकायो साकाको कर्नरमा ब्राजिलका सेन्टर ब्याकले डिबक्सको मध्यभागबाट हेडर प्रहार गर्दै बललाई जाली चुमाएका हुन्। यो गोल नै खेलमा निर्णायक बन्यो।

टोटनह्यामको यो लगातार दोस्रो हार हो। यसअघि टोटनह्याम न्यू क्यासल युनाइटेडसँग २–१ ले पराजित भएको थियो। चार खेलबाट चार अंक जोडेको टोटनह्याम अंकतालिकाको १३औं स्थानमा छ।