युभेन्टस पहिलो दुई खेल जित्ने एक मात्र टोली

काठमाडौं। डुसान भ्लाहोभिचले दुई गोल गरेपछि युभेन्टस सिरी ‘ए’ को पहिलो दुई खेल जित्ने एक मात्र टोली बनेको छ।

राइट ब्याक निकोलो साभोनाले पनि डेब्यु खेलमा गोल गरेपछि युभेन्टसले भेरोनालाई ३–० ले पराजित गर्दै लगातार दोस्रो जित हात पारेको हो।

भ्लाहोभिचले २८औं मिनेटमा तीन डिफेन्डरलाई बिट गर्दै १२ यार्ड गोल गरे। त्यसको ११औं मिनेटपछि साभोनाले हेडरमार्फत अग्रता दोब्बर बनाए। दोस्रो हाफको ८ मिनेटपछि भ्लाहोभिचले पेनाल्टीबाट गोल गर्दै युभेन्टसलाई सहज जित दिलाए।

जितसँगै शीर्ष स्थानको युभेन्टसले ६ अंक जोडेको छ। भेरोना तीन अंकका साथ नवौं स्थानमा छ।