इन्जुरी समयमा सम्हालिन नसक्दा युनाइटेड पराजित

काठमाडौं। इन्जुरी समयमा पेड्रोले गोल गरेसँगै म्यानचेस्टर युनाइटेड इङ्लिस प्रिमियर लिगमा ब्राइटनसँग पराजित भएको छ। 

फाल्मर रंगशालामा शनिबार भएको खेलमा युनाइटेड घरेलु टोली ब्राइटनसँग २–१ ले पराजित भएको हो।

ब्राइटनको जितमा ड्यानी वेलब्याक र जोआओ पेड्रोले गोल गरे। युनाइटेडका एमद डियालोले गोल गरेपनि पर्याप्त हुन सकेन।

जितसँगै दुई खेलमा ६ अंक जोडेको ब्राइटन शीर्ष स्थानमा उक्लिएको छ। पराजित युनाइटेड समान खेलबाट तीन अंकसहित आठौं स्थानमा छ।

वेलब्याकले ३२औं मिनेटमा गोल गर्दै ब्राइटनलाई सुरुआती अग्रता दिलाएका थिए। ६०औं मिनेटमा डियालोले युनाइटेडलाई खेलमा फर्काए। तर, इन्जुरी समयमा पेड्रोले गोल गर्दै ब्राइटनलाई २–१ को जित दिलाए।