डाँफे र गोर्खाज विजयी

क्यानडा, ओन्टारियो। सडबरीको नेपाली समुदायद्वारा आयोजित प्रथम नेपाली कप ७ ए साइड फुटबल प्रतियोगितामा डाँफे र गोर्खाज विजयी भएका छन्।

उद्घाटन खेलमा डाँफेले लालीगुराँस एफसीलाई २-१ ले पराजित गरेको हो। डाँफेका लागि समिद लामा र अमृतराज शाहले गोल गरे। लालीगुराँसका लागि सुलभ बस्नेतले गरेको एक मात्र गोल सान्त्वना बन्यो।

दोस्रो खेलमा गोर्खाज एफसीले सगरमाथा एफसीलाई २-१ ले हरायो। यस खेलमा गोर्खाज एफसीका लागि आदर्श पुरी र प्रज्वल काजी बस्नेतले एक/एक गोल गरे। सगरमाथा एफसीका लागि दीवेश राईले एक गोल गरेका थिए।

प्रतियोगिताको फाइनल खेल स्थानीय समयअनुसार आइतबार अगस्ट १८ मा साँझ ५:३० बजे हुनेछ। आयोजक समितिले यो प्रतियोगिताले सडबरीमा बसोबास गर्ने नेपाली समुदायबीचको सम्बन्धलाई अझ बलियो बनाएको विश्वास व्यक्त गरेका छन् ।