मोरोक्को पहिलोपल्ट ओलम्पिकको सेमिफाइनलमा

काठमाडौं। मोरोक्को पेरिस ओलम्पिकअन्तर्गत पुरुष फुटबलको सेमिफाइनल प्रवेश गरेको छ।

पार्क डेस प्रिन्सेसमा शुक्रबार भएको खेलमा अमेरिकालाई ४–० ले स्तब्ध बनाउँदै मोरोक्को अन्तिम चारमा प्रवेश गरेको हो। मोरोक्कोले पहिलोपल्ट ओलम्पिकमा अन्तिम चारको यात्रा तय गरेको हो। फाइनल प्रवेशका लागि मोरक्कोले स्पेनको सामना गर्नेछ

मोरोक्कोलाई जित दिलाउन सोफियान राहिमी, इल्यास अखोमच, अचरफ हाकिमी र एल मेहदी मोउहुबले गोल गरे।

२९औं मिनेटमा सोफियान रहिमीको पेनाल्टी गोलमार्फत मोरोक्कोले सुरुआती अग्रता लिएको थियो। ६३औं मिनेटमा इल्यास अखोमचले टोलीको अग्रता दोब्बर बनाए।

त्यसको सात मिनेटपछि अचरफ हाकिमीले गोल गर्दा मोरोक्को ३–० ले अगाडि बढ्यो। इन्जुरी समयमा एल मेहदी मोउहुबले पेनाल्टीमार्फत गोल गर्दै टोलीलाई सहज जित दिलाए।