एकदिवसीय क्रिकेटमा भारतीय टोलीको विकेटकिपर को?

काठमाडौं। श्रीलंकाविरुद्धको एकदिवसीय शृंखला सुरु भएसँगै २०२५ मा हुने च्याम्पियन्स ट्रफीका लागि भारतीय टोलीको अभियान सुरु हुनेछ।

यस सिरिजमा रोहित शर्मा र विराट कोहली पनि खेल्दैछन्। यस्तो अवस्थामा भारतीय टोलीले यो शृंखलाबाट धेरै जवाफ खोज्नुपर्छ। ती जवाफमध्ये पहिलो हो, एकदिवसीय क्रिकेटमा भारतीय टोलीको विकेटकिपर को?

केएल राहुल हाल एकदिवसीय ढाँचामा भारतीय टोलीका नियमित विकेटकिपर हुन्। गत वर्ष सम्पन्न एसिया कपदेखि नै उनले यो फर्म्याटमा भारतीय टोलीका लागि महत्त्वपूर्ण भूमिका खेल्दै आएका छन्।

गत वर्ष एसिया कपमा चोटपछि फर्किएका राहुलले विराट कोहलीसँग २३३ रनको साझेदारी गरेका थिए। एकदिवसीय विश्वकपमा मध्यक्रममा खेल्दै दुई अर्धशतक र एक शतकसहित ४५२ रन बनाएका थिए। 

राहुलले विकेट पछाडि पनि राम्रो प्रदर्शन गरे। विश्वकपमा उनले भारतीय टोलीको तर्फबाट दुई पटक उत्कृष्ट फिल्डरको अवार्ड पनि जितेका थिए। यदि उनलाई व्यक्तिगत रूपमा रोकिएन भने स्वाभाविक रूपमा राहुल विकेटकिपिङमा देखिनेछन्। ऋषभ पन्तले एकदिवसीय क्रिकेटमा पुनरागमन गर्न अझै केही समय कुर्नुपर्ने हुनसक्छ।

राहुल र पन्तको स्थान सुनिश्चित भएमा श्रेयस अय्यरले पनि स्थान बनाउनेछ। गत वर्ष एकदिवसीय विश्वकप र दक्षिण अफ्रिकामा अय्यर उत्कृष्ट लयमा रहे पनि घरेलु क्रिकेटलाई प्राथमिकता नदिँदा टिम व्यवस्थापनको आक्रोशको सामना गर्नु परेको थियो। तर, अय्यरको कप्तानीमा कोलकाता नाइट राइडर्सले १० वर्षपछि इन्डियन प्रिमियर लिग (आईपीएल) को उपाधि जितेको थियो।

अय्यर, राहुल र पन्त सबै सँगै एघारको हिस्सा हुन सक्छन्। तर, यस्तो अवस्थामा भारतीय टोलीले पाँच बलरसहित मैदानमा उत्रिनुपर्ने र यस्तो निर्णय लिने सम्भावना निकै कम छ।