स्पेनसँग १६ वर्षअघिको बदला लिन आतुर जर्मनी

काठमाडौं। युरोकपको सेमिफाइनल प्रवेश गर्न स्पेन र जर्मनी भिड्ने भएका छन्।

आइतबार राति सम्पन्न खेलमा स्पनेले जर्जियामाथि ४–१ को पुनरागमन जित हासिल गरेसँगै जर्मनीसँगको भेट पक्का गरेको हो। 

स्पेन समूहचरणमा अपराजित रहने एक्लो टोली बनेको थियो। त्यस्तै जर्मनीले भने स्विट्जल्यान्डसँग अंक बाँड्दा हंगेरी र स्कटल्यान्डलाई पराजित गर्दै अन्तिम १६ मा स्थान बनाएको थियो।

यी दुईबीचको खेल स्टटगार्ट एरेनामा शुक्रबार हुनेछ। सन् २००८ अर्थात् १६ वर्षअघि अर्न्स्ट-हप्पल स्टेडियम अस्ट्रियामा भएको युरोकप फाइनलमा जर्मनीलाई १–० गोलअन्तरले पराजित गर्दै स्पेनले उपाधि जितेको थियो।

यसपटक अन्तिम १६ मा डेनमार्कमाथि २–० को सहज जित हासिल गर्दै क्वार्टरफाइनल पुगेको जर्मनीलाई त्यो बदला फाइनलअघि नै लिने मौका जुरेको छ।