स्पेन समूह विजेता

काठमाडौं। फेरान टोरेसको निर्णायक गोलसँगै अन्तिम १६ मा पुगिसकेको स्पेन युरोकपमा समूह बीको विजेता बनेको छ।

मेर्कुर एरेनामा सोमबार राति सम्पन्न खेलमा स्पेनले अल्बानियालाई १-० गोलअन्तरले पराजित गरेको हो। 

स्पेनका लागि टोरेसले खेलको १३औं मिनेटमै गरेको गोल निर्णायक बन्यो। उनले दानी ओल्मोको पासमा गोल गरेका थिए।

तीन खेलबाट ९ अंक जोडेको स्पेनले पहिलो खेलमा क्रोएसियालाई ३-० गोलअन्तरले पराजित गरेको थियो। दोस्रो खेलमा साबिक विजेता इटालीलाई १-० ले पाखा लगाउँदै स्पेनले नकआउट चरणको यात्रा पक्का गरिसकेको थियो। 

अल्बानिया भने युरोकपबाट बाहिरिएको छ। इटालिसँग पहिलो खेलमा २-१ गोलअन्तरले पराजित भएको अल्बानियाले दोस्रो खेलमा क्रोएसियालाई २-२ गोलको बराबरीमा रोकेको थियो।