अस्ट्रेलियामाथि अफगानिस्तानको जित
काठमाडौं। अस्ट्रेलियाले एक खेलअगावै आइसिसी ट्वान्टी– २० विश्वकपको सेमिफाइनलमा प्रवेश गर्ने मौका गुमाएको छ।
आइतबार बिहान सम्पन्न सुपर एटको दोस्रो खेलमा अफगानिस्तानसँग २१ रनले पराजित भएसँगै अस्ट्रेलियाले अन्तिम खेलको नतिजा कुर्नुपर्ने भएको हो। अस्ट्रेलियाले अन्तिम खेल भारतसँग खेल्ने छ।
जितसँगै सुपर एटको समूह १ मा अफगानिस्तानले दुई अंक जोडेको छ। यद्यपि, अफगानिस्तान अस्ट्रेलियासँग रनरेटमा पछाडि छ। यो समूहबाट भारत सेमिफाइनलमा पुगिसकेको छ।
अंकविहीन बंगलादेश भने प्रतियोगिताबाट बाहिरिसकेको छ। अफगानिस्तानले दिएको १४९ रनको लक्ष्य पछ्याएको अस्ट्रेलियाले १९.२ ओभरमा सबै विकेट गुमाउँदै १२७ रन मात्रै बनाउन सक्यो।
अस्ट्रेलियाका ग्लेन म्याक्सवेलले सर्वाधिक ५९ रन बनाए। ४१ बल खेलेका उनले ६ चौका र तीन छक्का प्रहार गरे। कप्तान मिचेल मार्श १२ र मार्कस स्टोनियस ११ रनमा आउट हुँदा अन्यले दोहोरो अंकमा रन बटुल्न सकेनन्।
अफगानिस्तानका गुलबदीन नईबले सर्वाधिक चार विकेट लिए। नवीन उल हकले तीन विकेट लिँदा अजमतउल्लाह ओमरजाई र मोहम्मद नबीको नाममा समान एक विकेट रह्यो।
त्यसअघि टस हारेर पहिला ब्याटिङ थालेको अफगानिस्तान निर्धरित २० ओभरमा ६ विकेट गुमाउँदै १४८ रन बनाएको थियो।
अफगानिस्तानका गुरबाजले सर्वाधिक ६० रन बनाए। ४९ बल खेलेका उनले समान चार चौका र छक्का प्रहार गरे।
इब्राहिमले ४८ बलमा ६ चौकासहित ५१ रन बनाए। करिम जनत १३ रनमा आउट हुँदा मोहम्मद नाबी १० रनमा अविजित रहे। अन्यले भने राम्रो प्रदर्शन गर्न सकेनन्।
अस्ट्रेलियाका प्याट कमिन्सले सर्वाधिक तीन विकेट लिए। एडम जाम्पाले दुई र मार्कस स्टोयनिसको नाममा एक विकेट रह्यो।
