ग्रीन भ्यालीलाई उपाधि

लमजुङ। ग्रीन भ्यालीले प्रथम भेट्रान्स लमजुङ कप फुटबल प्रतियोगिताको उपाधि जितेको छ। लमजुङ फुटसलको आयोजनामा बेसीसहरमा बिहीबार सम्पन्न फाइनलमा धुरपुरे भेट्रान्स क्लबलाई ३-० गोलअन्तरले पराजित गर्दै ग्रीन भ्यालीले उपाधि जितेको हो। 

ग्रीन भ्यालीको जितमा लक्ष्मणबहादुर महतले दुई र राम थापाले एक गोल गरे। उपाधिसँगै ग्रीन भ्यालीले ५० हजार रुपैयाँ प्राप्त गर्‍यो। उपविजेता धुरपुरेले २५ हजारमा चित्त बुझयो।

प्रतियोगिताको सर्वाधिक गोलकर्ता धुरपुरेका केशर बराम र नरेश केसी भए। उनीहरूले समान सात गोल गरेका थिए।  प्रतियोगिताको उत्कृष्ट खेलाडी धुरपुरेका विश्वलाल श्रेष्ठ घोषित भए। उनीहरूले जनही २५ सय रुपैयाँ पाए।