रोहित भन्छन्- बलिङमा राम्रो गर्यौं, ब्याटिङमा अझ राम्रो गर्न सक्थ्यौं

काठमाडौं। नेपाली राष्ट्रिय टोलीका कप्तान रोहितकुमार पौडैले आइसिसी ट्वान्टी-२० विश्वकपअन्तर्गत समूह चरणको अन्तिम खेलमा राम्रो ब्याटिङ गर्न नसकेको स्वीकार गरेका छन्।

सोमबार सम्पन्न समूह ‘डी’ को अन्तिम खेलमा बंगलादेशसँग २१ रनले पराजित भएसँगै एक दशकपछि विश्वकपमा फर्किएको नेपाल जितविहीन हुँदै प्रतियोगिताबाट बाहिरियो।

बंगलदेशले दिएको १०७ रनको लक्ष्य पछ्याएको नेपालले १९.२ ओभरमा सबै विकेट गुमाउँदै ८५ रन मात्रै बनाउन सक्यो। ‘बलिङ युनिटको रूपमा हामीले साँच्चै राम्रो गर्यौं। ब्याटिङ युनिटको रूपमा हामीले अझ राम्रो गर्न सक्थ्यौं। विशेष गरी शीर्ष क्रमका ब्याट्सम्यानहरूले,’ उनले भने।

बंगलादेशका बलरले नयाँ बलमा राम्रो बलिङ गरेपछि नेपालको ब्याटिङ लाइन दबाबमा परेको उनले बताए। बंगलादेशका मिडियम फास्ट बलर तन्जिम हसन सकिबले चार ओभर बलिङ गर्दै दुई मेडनसहित सात रनरख्चिएर सर्वाधिक चार विकेट लिए। मुस्ताफिजुर रहमानले तीन र शकिब अल हसनले दुई विकेट लिँदा तस्किन अहमदको नाममा एक विकेट रह्यो।

‘बंगलादेशले नयाँ बलमा राम्रो बलिङ गर्‍यो र त्यसपछि हामी दबाबमा पर्‍यौं। हामीले त्यसपछि सानो साझेदारी बनायौं, तर शीर्षक्रमका ब्याट्सम्यानहरूले राम्रो गर्न सक्थे र थप जिम्मेवारी लिन सक्थे। हामीले स्टेप अप गर्न आवश्यक छ, कहाँ रन स्कोर गर्ने र कसरी अवस्थाको मूल्यांकन गर्ने भनेर जान्न आवश्यक छ,’ उनले भने।