स्कटल्यान्डसँग ओमान पराजित
काठमाडौं। स्कटल्यान्डले आइसिसी ट्वान्टी- २० विश्वकपमा ओमानलाई पराजित गरेको छ। सोमबार बिहान सम्पन्न खेलमा स्कटल्यान्ड सात विकेटले विजयी भएको हो।
समूह ‘बी’ मा रहेको स्कटल्यान्डले तीन खेलबाट चार अंक जोडेको छ। स्कटल्यान्ड शीर्ष स्थानमा छ । पहिलो खेल भने वर्षाले प्रभावित हुँदा स्कटल्यान्डले इङ्ल्यान्डसँग अंक बाँढेको थियो । तीन खेल खेलेको ओमान अझै अंकविहिन छ ।
ओमानले दिएको १५१ रनको लक्ष्य स्कटल्यान्डले १३.१ ओभरमा ३ विकेट गुमाएर पूरा गर्यो।
स्कटल्यान्डका ब्रान्डन म्याकमुलेनले सर्वाधिक ६१ रन बनाए । ओपनर जर्ज मुन्सीले ४१, माइकल जोन्स १६ र रिचर्ड बेरिंग्टन १३ रनमा आउट हुँदा मैथ्यू क्रस १५ रनमा अविजित रहे।
ओमानका बिलाल खान, अकिब इलियास र मेहरान खानले समान एक विकेट लिए। त्यसअघि टस जितेर पहिला ब्याटिङ गरेको ओमानले निर्धारित २० ओभरमा सात विकेट गुमाउँदै १५० रन बनाएको थियो।
ओमानका प्रतिक अथाभालेले सर्वाधिक ५४ रन बनाए । आयन खान ४१, अकिब इलियास १६, मेहरान खान १३ र नसिम खुसी १० रनमा आउट हुँदा अन्यको प्रदर्शन राम्रो हुन सकेन।
स्कटल्यान्डका साफ्यान शरिफले सर्वाधिक दुई विकेट लिए।
