बाबर–रिजवानको उत्कृष्ट प्रदर्शनमा पाकिस्तानको उपाधि जित्ने लक्ष्य

काठमाडौं। एक पटकको ट्वान्टी–२० विश्वकप च्याम्पियन पाकिस्तान टोली पछिल्ला दुई संस्करणमा उपाधिनजिक पुगेपनि जित्न भने सफल भएन।

सन् २०२४ को ट्वान्टी–२० विश्वकपमा पाकिस्तानले एक दशकभन्दा लामो समयको प्रतिक्षाको अन्त्य गर्ने प्रयास गर्नेछ। यस संस्करणमा पाकिस्तानले बिहीबार आयोजक अमेरिकासँग आफ्नो पहिलो खेल खेल्नेछ। यो खेल नेपाली समय अनुसार राति ९ : १५ बजे सुरु हुनेछ।

पाकिस्तानले लिग चरणमा दोस्रो खेलमा चिरप्रतिद्वन्द्वी भारतसँग सामना गर्नेछ। जुन ९ मा हुने खेल राति ८:१५ बजे सुरु हुने छ। त्यसपछि जुन ११ र १६ मा पाकिस्तानले क्यानडा र आयरल्यान्डसँग खेल्नेछ। यी दुवै खेल नेपाली समय अनुसार राति ८ बजेबाट हुनेछन्।

पछिल्ला केही समय पाकिस्तानी टिमका लागि राम्रो रहेन। विश्वकप सुरु हुनुअघि इङ्ल्यान्डसँगको ट्वान्टी–२० शृंखलामा २–० ले पराजित भएको थियो। अघिल्लो शृंखलामा पाकिस्तान आयरल्यान्डसँग पराजित भएको थियो। 

तर, पाकिस्तानका केही मुख्य खेलाडीहरूसँग क्यारेबियन प्रिमियर लिग (सीपीएल)को धेरै अनुभव छ। इमाद वासिमले प्रतियोगितामा ५४ खेल खेलेका छन्।

वासिमले २०१६ यता सीपीएलमा विदेशी खेलाडीका रूपमा ६१ विकेट लिएका छन्। उनी सर्वाधिक विकेट लिने विदेशी खेलाडीको सूचीमा दोस्रो स्थानमा रहेका छन्। आजम खानले प्रतियोगितामा ४६ छक्का प्रहार गरेका छन्, जुन २०१६ यता विदेशी ब्याट्सम्यानको चौथो सर्वाधिक छक्का हो।

बाबर आजम र मोहम्मद रिजवानले एक जोडीको रूपमा ट्वान्टी–२० अन्तर्राष्ट्रियमा ६५ इनिङ्समा ५० को औसतमा ३०९५ रन बनाएका छन्।

यो ट्वान्टी–२० ढाँचामा सबैभन्दा उच्च हो। दुवैले अहिलेसम्म १० शतक र १३ अर्धशतकीय साझेदारी गरेका छन्। यो जोडी ट्वान्टी–२० विश्वकपमा पनि उत्कृष्ट रहेको छ। १३ इनिङ्समा उनीहरुले ५३ को औसतमा जोडीको रुपमा सर्वाधिक ६३६ रन बनाएका छन्।

पाकिस्तानले ट्वान्टी–२० विश्वकपमा लगातार उत्कृष्ट प्रदर्शन गरेको छ र अहिलेसम्म तीन पटक फाइनल खेलेको छ। पाकिस्तान पहिलो र अघिल्लो संस्करणहरूमा उपविजेता भएको थियो।

सन् २००९ मा भने पाकिस्तान पहिलो पटक विजेता बनेको थियो। पाकिस्तानले सन् २०१०, २०१२ र २०२१ मा तीन पटक सेमिफाइनल खेलेको छ।