भारत र आयरल्यान्ड भिड्दै

काठमाडौं। ट्वान्टी–२० विश्वकप २०२४ मा भारतले पहिलो खेलमा बुधबार आयरल्यान्डसँग न्यूयोर्कमा प्रतिस्पर्धा गर्दैछ।

यो खेल नेपाली समयअनुसार राति ८ : १५ बजे सुरु हुनेछ। ट्वान्टी–२० मा यी दुई टोलीबीचको यो नवौं खेल हुनेछ। भारत र आयरल्यान्डबीच हालसम्म भएका आठमध्ये भारतले सात खेल जितेको छ भने एक खेल रद्द भएको छ।

ट्वान्टी–२० विश्वकपमा दुवै टोली एकपटक भिडेका छन्, जसमा भारत विजयी भएको छ। भारतीय टोलीले सन् २००७ मा एकपटक ट्वान्टी–२० विश्वकप जितेको थियो भने आयरिश टोली २००९ मा सुपर–एट मा पुगेको थियो।

ट्वान्टी–२० विश्वकप २०२२ मा भारतीय टोली सेमिफाइनलमा पराजित भएको थियो भने आयरिश टोली सुपर–१२ बाट बाहिरिएको थियो।

यस वर्षको सुरुमा भारतीय टोलीले ट्वान्टी–२० म्याचको शृंखला खेलेको थियो। जसमा भारतले अफगानिस्तानलाई ३–० ले पराजित गरेको थियो। तर, सबै भारतीय खेलाडी दुई महिनाको आईपीएल खेलेर फर्किएका छन् र अहिले लयमा छन्।

आयरल्यान्डले मे २०२४ मा स्कटल्यान्डविरुद्ध शृंखला खेलेको थियो। चार खेलमा अपराजित रहँदै आयरल्यान्डले शृंखला जितेको थियो। यसअघि तीन खेलको शृंखलामा पाकिस्तानलाई पनि एक खेलमा पराजित गरेको थियो। यद्यपि यो शृंखला पाकिस्तानले २–१ ले जितेको थियो।