नेपाली टोलीलाई रोहित र दीपेन्द्रमाथि आश

काठमाडौं। आइसिसी ट्वान्टी–२० विश्वकपअन्तर्गत नेपालले समूह ‘डी’ को पहिलो खेलमा मंगलबार नेदरल्यान्ड्ससँग खेल्दै छ।

डलासको ग्रान्ड प्रायरी स्टेडियममा हुने यो खेल नेपाली समयअनुसार राति ९: १५ बजेबाट सुरु हुने छ। नेपाली टोली एक दशकपछि ट्वान्टी–२० विश्वकप फर्किएको छ। दुवै टोली जितसँगै यात्रा सुरु गर्न चाहन्छन्।

यी दुई टोलीबीच हालसम्म १२ ट्वान्टी–२०अन्तर्राष्ट्रिय खेल भइसकेका छन् र स्थिति लगभग बराबरीमा छ। नेदरल्यान्ड्सले ६ खेल जितेको छ भने नेपालले पाँच खेल जितेको छ।

एक खेलको नतिजा आएको छैन। २०२१ को कुरा गर्ने हो भने दुई टोलीबीच ६ वटा खेल भएका छन् र दुवैले तीन–तीन खेल जितेका छन्। ट्वान्टी–२० विश्वकपमा दुवै टोली पहिलो पटक भिड्दैछन्।

नेपालका लागि कप्तान रोहित पौडेल र दीपेन्द्रसिंह ऐरी महत्त्वपूर्ण खेलाडी हुनेछन्। गत वर्ष नेपालका कप्तान रोहितकुमार पौडेलले १३ इनिङ्समा ५०.३७ को औसतमा ४०३ रन बनाएका थिए।

वेस्ट इन्डिज ‘ए’ विरुद्ध घरेलु मैदानमा भएको शृंखलामा एक शतक र दुई अर्धशतकसहित चार खेलमा २६५ रन बनाएका उनी उत्कृष्ट फर्मका साथ टी–२० विश्वकपमा प्रवेश गर्दैछन्।

दीपेन्द्रसिंह ऐरीले पछिल्लो १२ महिनामा टी–२० को ५६ इनिङ्समा १ हजार ६२६ रन बनाएका छन्। गत वर्ष उनले एशियाली खेलकुदमा मंगोलियाविरुद्ध सबैभन्दा छिटो (९ बलमा) टी–२० अर्धशतक बनाउँदै कीर्तिमान कायम गरेका थिए।

हालै उनले कतारविरुद्ध ६ बलमा ६ छक्का प्रहार गरेका थिए। दीपेन्द्रले गत विश्वकपदेखि करिब १९१ को स्ट्राइक रेटमा रन बनाएका छन्, जुन ग्लेन म्याक्सवेलपछि विश्वको दोस्रो उच्च स्ट्राइक रेट हो।

दीपेन्द्र एक राम्रा अफ स्पिनर पनि हुन्। उनले टी–२० मा ३७ विकेट लिइसकेका छन् र उनी राम्रो फिल्डर पनि हुन्। उनले बलिङमा पनि १९ को औसतमा १६ विकेट लिएका छन्। बायाँ हाते ब्याट्सम्यानहविरुद्ध उनको इकोनोमी ७.८१ र दायाँ हाते ब्याट्सम्यानहविरुद्ध ६ छ।