श्रीलंकामाथि दक्षिण अफ्रिकाको जित

काठमाडौं। दक्षिण अफ्रिकाले आइसिसी ट्वान्टी-२० विश्वकपमा विजयी सुरुआत गरेको छ। सोमबार सम्पन्न खेलमा दक्षिण अफ्रिकाले श्रीलंकालाई ६ विकेटले पराजित गरेको हो।

श्रीलंकाले दिएको ७८ रनको लक्ष्य पछ्याएको दक्षिण अफ्रिकाले १६.२ ओभरमा चार विकेट गुमाउँदै ८० रन बनायो। दक्षिण अफ्रिकाका क्विन्टन डि ककले सर्वाधिक २० रन बनाए। २७ बल खेलेका उनले एक छक्का प्रहार गरे।

टि्टन स्टब १३ र एडम मारक्रम १२ रनमा आउट हुँदा हाइनरिक क्लासन १९ र डेविड मिलर ६ रनमा अविजित रहे। श्रीलंकाका वानिदु हसरंगाले सर्वाधिक दुई विकेट लिए। नुवान तुषारा र दसून शानकाले समान एक विकेट लिए।

त्यसअघि नासाउ काउन्टी अन्तर्राष्ट्रिय क्रिकेट स्टेडियम, न्यूयोर्कमा टस जितेर पहिला ब्याटिङ गरेको श्रीलंकाले १९.१ ओभरमा सबै विकेट गुमाउँदै ७७ रन बनायो। 

श्रीलंकाका कुसल मेन्डिसले सर्वाधिक १९ रन बनाए। ३० बल खेलेका उनले एक चौका प्रहार गरे। एन्जलो मैथ्यूज १६ र कामिन्डु मेन्डिस ११ रनमा आउट हुँदा अन्यले राम्रो प्रदर्शन गर्न सकेनन्।

दक्षिण अफ्रिकाका अनरिख नार्खिएले सर्वाधिक चार विकेट लिए। चार ओभर बलिङ गरेक उनले सात रन खर्चिए। केशम महाराजा र कागिसो रबाडाले समान दुई विकेट लिँदा आन्नील बार्टम्यानको नाममा एक विकेट रह्यो।